2018-10-18

【為「吸血鬼」打工】全城癱瘓也無阻返工決心！打工仔賣力工作換來甚麼？

　　上月16日香港受颱風「山竹」影響，又爆玻璃、又塌樹、又「有限」交通工具，大家17號一樣可以排除萬難，穿梭城市森林徒步返工。大家咁緊張因為返唔到工會無勤工、畀人扣糧、畀人炒㗎。而一個月過後，香港人必死返工之心再現！港鐵「四線齊冧」，香港人40分鐘搭3個站、等10架巴士都上唔到車依然亳無怨言，只關心遲到點樣同老闆交待。漫長車程，令我有（太多）時間去反思究竟我嘅真正身份係人定狗，抑或政府同有錢人當全港市民係狗？

　　話說「山竹」襲港後，小妹放棄50年唔飲唔食儲錢買樓，去咗廢青最鍾意嘅日本旅行。又咁啱得咁橋喺日本遇上超強颱風「潭美」，親身經歷過，先知道日本對待颱風嘅處理方法同香港有幾大分別。

　　首先，政府通訊極度透明。重災日當日，政府及所有公共交通運輸公司早於下午12點已公佈夜晚8點將會暫停營運，呼籲市民盡早返歸，而公司亦應盡早安排員工收工。我明白日本始終大過香港，有啲人每日通勤可能需要3-4個鐘，所以咁早公佈等大家可以預時間返屋企。但有成8個鐘buffer位，畀市民同打工仔彈性使用公具交通工具，避免因突然嘅過度使用而造成混亂。同香港相比，返返下工突然掛個8號風球，幸運嘅打工仔可以狗衝向「望到但接近唔到」嘅巴士站或地鐵站，再等十零廿架車先迫到上車，再塞你3-4個鐘頭車程先返到屋企……而唔幸運嘅港奴當然因為突如其來嘅通知，未做晒嘢要冒住爆玻璃窗嘅危險繼續做嘢啦。淨係睇政府決策就知道民生有幾受政府重視啦！

　　第二，老闆或有錢人嘅人性分別。睇新聞成日話日本打工仔慘絕全球，好多打工仔受唔住壓力自殺，計我話香港人就仲慘！交通工具措施公佈咗之後，街上面一半嘅鋪頭係下晝3點已經閂咗門！即係日本「吸血鬼」3點就放員工收工，唔再賺錢！香港人呢？就算冇巴士、大樹檔路、甚至地鐵跪低，香港人一樣當被冚，徒步（加徒手）返工，但港版「吸血鬼」都仲要扣大家勤工錢。你話，一個人冇人性到咩地步？

　　香港人嘅存在唔係為有錢人打工、為有錢人賺錢，打工仔都應該有打工仔嘅私人生活。點解香港人會變到明明係全城崩壞、甚至天災，都可以將責任自己孭上身？而我，因為地鐵冧檔，望住過海方向長長嘅車龍及唔知邊條先係過海巴士嘅隊尾，甚麼勤工、Attendance統統Don't give a shxt！返轉頭食個早餐打埋篇專欄先返工啦！有時，上司都係要調教嘅！

《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇