【大伏啊！】小薯上公司興趣班＝出戰場搏殺　連公餘時間都要比腦細操控！

　　有啲公司為咗增加員工歸屬感，不時都會難為HR，安排各種唔同嘅興趣班或比賽俾員工參加。此舉除咗可以俾我地以低價學習工餘興趣班之外，其實公司都係想當我地狗咁，得閒放下電、防止員工有力去抗爭要求更多嘢。但隨住時間流逝，興趣班開始變質，成為team head們針鋒相對嘅另一個擂台，可憐嘅同事諗住收工後散心休息下，都被推出戰場搏殺。

　　HR受命安排興趣班，初衷都係想唔同department嘅同事互相認識吓，俾大家辦起事上嚟有個朋友可以幫吓手，令工作更有效率。對員工而言，除咗可以俾大家真正認識唔同部門嘅同事，令我地唔洗日日好似對住筆友咁同email嘅另一方交談，但又唔知對方乜水，其實都係擴展自己network嘅好機會。以football team為例，相信好多男人簡單較吓腳，就已經可以同對方吹兩咀、交換吓波經；甚至有啲同事將公司football team嘅同事帶到自己生活圈子嘅足球比賽，成為真正嘅波友。牌面睇呢啲聯誼活動對公司、員工都有正面發展。但偏偏好勇鬥狠嘅department head又鍾意威，將一個浪漫而充滿兄弟情嘅地方轉化為令佢地互相廝殺嘅是非之地，即係安排inter-department 比賽。

　　曾經昔日嘅波友，由你、我互相「撩」波產生身體接觸時都尷尬嘅關係，昇華到今日更衣室內玉帛相見地大談感情問題，失驚無神你要佢地撕片？唔好以為有感情就會留手！事關department head由比賽前幾星期已經放哂風，呢場波希望各位可以展現出「友誼及比賽都第一嘅精益求精態度」，仲為咗要員工加緊練波，幫大家準備咗shuttle bus出發到球場練波、更係食晏後身體力行同同事一齊行樓梯返OFFICE練氣，最終反而要同事等佢，浪費大家時間。終於到咗比賽日，人在江湖，身不由己。幾個department head金睛火眼咁「目及」實每個下屬，邊個放水即刻記住佢個樣（因為記唔到佢個名），大家目的只有贏得公司冠軍，從而獲得機會向老闆刷存在感。

　　但出去戰場上衝嘅，又係一班流血流汗都寂寂無名嘅小薯。人家一心諗住收工出去踢吓波、減下壓，點知公餘活動反而成為壓力來源。Football Team、瑜伽班、語言班等等活動，有cert鬥cert，無cert就鬥比賽，department head將辦公室鬥爭好似警棍咁伸延至私人時間，中招小薯唯有連公司benefit都唔要，寧願自己出面俾錢學好過，個個即刻quit班。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情