【年假陰謀論】小薯收到Email大喊要跳槽！只因公司年假「伏味」濃

　　打工仔衡量一份工，除咗要睇佢人工、醫療之外，最表面一定係睇有幾多日有薪年假啦。你話7日年假吸引啲，定係20日年假吸引啲？我明白有啲公司就算俾足30日年假你，無良嘅老闆都唔會俾你放假，再將你啲用唔晒嘅假「吞」咗。但點都好，唔理你有冇得放假，多假就一定好過少假。最近，我哋公司好大手筆咁向全公司上下所有人加一日annual leave，但點解我哋個個喊苦喊忽大叫要跳槽？

　　首先講講呢封偉大又「激」勵人心嘅e-mail。呢封e-mail由HR係收工時間Send出，目的係為咗阻止我哋係公司起哄，而又知道WhatsApp起哄能力有限，所以揀係深夜Send出！內容除咗宣佈公司為咗答謝大家，由2019年起全公司上下都加一日annual leave，仲提到所有係公司連續工作5年又冇升職嘅員工可以額外獲得多1日；7年額外多2日，最多可得到額外3日annual leave。表面好似只有利而無一弊處，但經過一晚WhatsApp小組討論，大家醒覺呢封e-mail背後嘅含意。 

　　臨近過年（本人公司紅底，每年都會係農曆新年果個月派bonus），你最緊張咩嘢？緊係公司派幾多Bonus或有冇雙糧啦！公司一早放咗風，話今年冇錢賺，唔會派bonus。所以我哋就估計HR為咗將「宣佈死亡」後嘅影響減到最低，係月頭先俾少少甜頭我哋，平息怒氣。講真，多一日annual leave唔係唔好，但有Bonus會開心啲、值錢啲囉。再者，儲儲埋埋啲假，放長假又話唔俾離開公司咁耐；放短假又話做乜放假放得咁密，淨低咗啲假你又唔肯補返錢，甚麼一年365日年假都係垃圾啦！我不如要錢實際啲？

　　另外，大家有冇發現俾老臣子多啲年假嘅政策好奇怪呢？做得耐，你荀多1-2日假俾佢以示感謝佢咁忠心係冇問題，但點解要做得耐又冇升過職嘅員工先可得到呢個福利呢？其實呢個政策除咗鼓勵員工唔好R升職，亦係留人嘅小手段。對於一間公司嚟講，唔夠奴隸就唔可以幫公司賺到盡；而對HR嚟講，年資耐嘅員工點都比新入職員工穩定，所以必須派糖甜下一班老臣子，等佢哋唔好俾「冇Bonus」嘅消息震走，繼續為公司效勞。

　　其實講到尾，一封看似有著數嘅e-mail喺深夜SEND出黎，都知唔係好嘢。諗深一層大家先知係「贏粒糖，輸間廠」嘅先兆，難怪個個多咗個Annual都大叫「多X謝」!

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】民主派初選案，45名罪成被告判囚4年2個月至10年不等，你認為判刑是否具阻嚇作用？► 立即投票