2018-08-30
【打工仔唔易做】星期日成條team都返齊公司？只為一個上位機會……
隨著科技進步，好多人都話打工仔根本冇收工。電話、E-mail、甚至近年嘅WhatsApp，通通都將打工仔變成遙控狗。就算唔需要露面，老闆一樣可以遙距點你做嘢！而上星期，公司就發生咗一件「因為科技及階級觀念，令半間公司嘅同事都衝返辦公室」嘅事。
相信每個星期五，大家都會有咁chur得咁chur，務求執齊手尾，等自己可以過個happy weekend！奈何星期日嘅時候，各個同公司有關係嘅WhatsApp group都打鑼咁搵人，直情想炸爆你部電話為止！你知啦，唔同project總會有唔同嘅group，明明都係嗰班人，開下開下廿幾、三十個group絕非奇事，但成30個group喺短時間之內輪流搵人，場面都幾震撼！但究竟公司咁急搵人，有咩事呢？
「Anyone in office now?」
傻的嗎？星期日想搵人喺Office ?你估我哋真係每分鐘幫公司賣命咩？結果梗係冇人覆佢啦！但過咗5分鐘左右，又一個message⋯⋯
「Anyone in Central or Hong Kong Island now? Please help Mr.X to unlock the office door.」
嘩！個範圍大到1/3個香港都俾你點名，而且仲話幫大老細開門喎！能夠為大老細效勞，你哋估下有幾多人衝出嚟擦鞋⋯⋯
答案係，冇一個人覆阿姐！咪住！高潮位而家先開始！雖然冇人係WhatsApp group度發言，但就有差唔多成條Team嘅人返咗公司開門比老細！做老細嘅，見到星期日啲員工都咁生性，仆返嚟為自己開門，梗係老懷安慰。做擦鞋仔嘅，見到WhatsApp group無人覆，諗住自己偷偷地過去拯救大老細，露吓面、sell吓自己、搏返一官半職，點知遇著一班相同諗法嘅擦鞋同事，現場你眼望我眼，大家諗咩，心照啦！
其實打工仔擦鞋人之常情，唔擦鞋又點得世間財呢？所以大家爭住做「老細守護者」真係冇人會鄙視。但係就好心啲老細，唔好趁人哋放假先話返公司，但係自己又唔帶門卡！雖然佢只係send左一個簡單嘅求救message，但你諗下，由老細級傳向經理級，再由經理級傳向小薯級，你認為呢個message又有幾chill呢？小薯收到呢個message，當見唔到又唔敢，但又唔想做擦鞋仔，真係進退兩難！而經理級人物點解唔親自救駕？因為只要有自己旗下嘅小薯救到駕，掌聲一樣可以賜予係經理身上！一句到尾，做細嘅做乜都好，都係為上層鋪路咋！
《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。
【你點睇】美國總統拜登卸任前宣布特赦兒子亨特拜登，你認為美國民主及法治制度是否已經受損？► 立即投票
