【查佢啊ICAC！】身為食物鏈最低層，更要齊心匿名舉報懷疑貪污事件（下）

　　上星期講到一班兵蟻Marketing無論幾努力都好，都打唔贏位高權重嘅marketing大佬嘅決定。執意嘅決定本來已經令到一眾「執行者」小薯十分不滿，但原來低處未算低，事情嘅發展更加令到大家懷疑高層收受利益，有貪污之嫌。但，身為食物鏈最低層嘅我哋，又到咗最兩難嘅時候：舉報定啞忍？

　　心早已灰嘅大家就算唔想做，都要做，鬼叫你窮咩？唯有迫住同agency合作。活動開價3-4百萬，一個稍為中型少少、有少少嘢睇、有少少KOL撐場嘅活動、有少少媒體出席嘅活動，3-4百萬都好合理！Agency嘅creative brief包含晒所有應有嘅嘢，而又因為對方十分有交帶且得到大佬拍心口做擔保，所以大家都期待可以做到個「似樣」嘅活動，為成個project做出有效嘅宣傳之用，放手交畀agency去做。但往往實情同理想總有出入……

　　活動當日，簡陋到本來以為係demo嘅場地裝飾，竟然係真實版！即是除咗一塊印有活動資料嘅banner外，現場甚麼裝飾都沒有。活動內容毫無creative成份，只選擇了最基本的剪綵、致辭活動，連剪綵用具都看似係循環再用！請嘅果班KOL唔好講match唔match brand image，直頭唔再三提醒佢嘅成名作係咩都唔認得佢，大會MC仲要自家製，話用公司自己人可以更了解公司運作，畀人問起嘢上嚟時都識答喎！所有嘢都咁弱雞，咁……啲錢用咗去邊？Quotation同invoice？Marketing大佬話有錢銀關係嘅嘢都要直接交畀佢去處理，免得合作價錢畀員工知道，跳槽時泄露出去喎。咁你話，一個活動洗幾多錢、點洗，只有大佬同agency知，當做出嚟嘅嘢又差又貴，都要堅持用佢嘅時候，唔係官官相護係乜？

　　為咗呢件事，大家由唔gur變到懷疑佢地有貪污。圍內討論就緊係死咬個大佬有錢落袋啦，但事實上我地冇任何實質證據。雖然，懷疑貪污已經可以去ICAC匿名舉報，但作為打工仔同時又好驚，驚有二五仔監視你，到時比marketing大佬知道唔好話炒魷，佢人面咁廣直頭出返去都做唔返同行、又話者有咩事冇左個大佬係上面，人事震盪震都震死埋自己。講真，自私啲講，佢打斧頭都係呃公司錢，對自己毫無影響，只係覺得工作上唔公平、冇發揮，不滿令你想舉報佢啫。但舉報咗幫自己出返啖氣，換來咁多位小薯飯碗岌岌可危。你，作為一粒要生存嘅薯仔，會捍衛廉潔公義，定保護自己飯碗？

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【香港好去處】etnet全新頻道盛大推出！全港最齊盛事活動資訊盡在掌握！► 即睇