2018-03-15
【職場八卦陣】返工唔敢剪頭髮「我怕大家問起我!」
一對情侶之中,男方最怕女方問埋啲無謂問題,特別係「BB,我今日有咩唔同啊?」搽左唇膏?新衫?肥咗?瘦咗?答咩都好似會死咁⋯最終原來女方剪咗頭髮!「係喎,修短左1mm喎!成個人睇落真係後生咗喎!」男方發現唔到緊係畀人凌遲處死咗啦!但你又估唔估到,係公司竟然會有人唔想畀人知自己剪咗頭髮!
公司班女人不嬲鍾意鬥行頭、乜都鬥貴。有次港女女同事電咗個新髮型返嚟,其他女同事即刻圍埋討論:
「Cynthia,整咗個頭好靚喎!」
「之前個頭又旱又亂,我忍咗幾耐啊!難得有時間去搵我個髮型師,咪電埋髮、焗埋油囉!」
「其實我都想轉髮型師好耐,你跟開呢個整得好唔好?」
「好就幾好嘅,不過有啲貴囉!好似我個頭咁,係咁易電個髮、焗個油就2千蚊。不過計我話,呢啲錢唔慳得!整得唔好睇點出嚟見人?」
「2千蚊包電髮焗油仲想點啊?我呀,就咁剪過頭髮都7-800蚊喇!你嗰間好平㗎啦!整頭真係唔可以貪平囉!」
好記得大家當日好似拍賣行啲買家咁,不斷開出更高嘅價,去形容自己整個頭。未見贏家,我就冇心機聽落去了。直至有一日,我覺得有位女同事感覺唔同咗,但又講唔出邊度有改變,好奇心加想偷懶驅使之下,我出口問佢:
「Isabella,你今日好似有啲唔同,但我又講唔出邊度唔同咗!」
「哦,係咪因為我整咗頭髮啊?」
「係喎!係髮型啦!你唔講都唔覺你整咗喎!」
「哈哈!其實我特登嘅!因為我唔想比其他人發現我整咗頭髮啊!(細細聲)」
「下,點解呢?」
「佢哋個個整親頭都幾千蚊上落,唔通我同佢哋講我個頭整咗$500咩!」
「唉,唔使理佢哋啦!同埋我覺得你個頭整得幾好睇呀!個髮型師都勁喎,真係整到你個頭無人發現到咁滯!」
「因為間salon係我朋友開,我都跟咗佢整頭好多年啦!話就話喺長沙灣地區,唔及得佢哋中、上環咁高級,但我朋友手勢絕對唔差!邊個話貴野一定專業啲?你見我要求整完好似冇整咁,就知佢有料啦!哈哈!」
其實班三姑六婆不斷晒自己整頭要幾多錢,都係想抬高身價。但Isabella真係講得好啱,世事唔係貴就好嘅。講得難聽啲,你貴極,都係識個打工仔;人哋雖然係平,但就識得個老闆,論人脈真係贏幾條街。其實公司「鬥貴論」風氣愈嚟愈嚴重,唔啱聽嘅,可以自動幫佢哋消音,免得同佢地一般見識。
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】巴黎奧運正式閉幕,今屆你感到最深刻的地方是?► 立即投票