【打工仔on call 24小時】星期六、日要做野？想上位小心命都冇！

　　「打工仔因為工作過勞而死」呢啲新聞好似周不時都聽到，但當當事人同自己有距離時，就好似電視廣告咁：「點會揀我喎，人地先得嗰廿幾歲！」但隨住科技發展，愈來愈多香港打工仔要廿四小時on call。其實諗深一層，呢個工作模式嘅轉變，令到唔少打工仔唔死都內傷！「做得小薯，我收工就收工，理得佢搵我，當睇唔到囉！」係呀，呢句講就講得輕鬆，但實情你總會身不由己。 

　　自從通訊軟件興起，再有電子達人破解如何唔畀sender知道你睇左message，硬件、軟件上，你確實可以「收左工就理得佢」，但點解我會話大家身不由己？試諗下，而家公司最講team work，即係有事成班人一齊被拖落水，雖然對打工仔黎講係推卸責任嘅好機會，但對應付周末嘅腦細黎講，就成為一個非常大嘅問題！腦細一個簡單要求，總會有勤力、或者想上位嘅同事係放假期間，都立即幫佢處理。但正如頭先所講，team work!!隔離位同事處理完，仲要pass俾你去完成你負責嗰部分，先幫腦細解決到佢嘅問題。係呀，全世界星期六日都做嘢，而家差你咋，你唔係選擇繼續潛水呀嘛？如果你繼續潛水，就抹殺左大家係星期六日做嗰份心血；但如果你死死氣幫佢做得一次，恭喜你，你會開始加入24小時standby嘅工作小隊，甚至乎會慢慢適應呢個工作模式。 

　　生理上，24小時Standby工作影響之大人人都知！一個星期七日隨時準備做嘢，個人keep住工作緊張mode，覺又瞓得少，仲要補眠時都on call，睡眠質素同健康狀況可以有幾好？不過，唔使你講，你個身體都會代你出聲。唔係點會咁多打工仔又便秘、又頭痛、又胃痛、又口臭、又關節酸痛等等幾十樣野，直頭仲虧過我啊嫲！ 

　　心理上更加大獲！返工時間都算，放工時間（包括星期六日）每分每秒都要留意手機有冇人搵你，放假時出街都唔敢，怕冇電腦跟身，有起事上嚟做唔到、甚至變到好驚電話星期六、日響，因為唔想又有公事搵你。長年累月積聚落嚟嘅壓力、焦慮，嚴重影響你生活之餘，唔搞到你痴線當你好彩！所以我真心奉勸咁多位，星期六、日畀人召喚出黎，真係可以厚面皮少少唔好理，有急事嘅會打畀你做，甚麼whatsapp group發起齊齊做野真係不可一不可再。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】有學者倡60至65歲以下長者之2元乘車優惠，設每月補貼上限700元，你點睇？► 立即投票