【搵工最緊要狠】同事見工技巧！跳槽連升3級不是夢

　　隔離位同事終於忍到核爆，最近積極搵工！坐佢隔離嘅我，梗係容易睇得出佢每日有咩唔同啦！所以，每次當佢想偷走出去interview，我都會一盡綿力，幫佢逃過同事、上司們嘅法眼。不過辦公室潛規則，「等價交換」，我幫得你，你緊係要解決我嘅好奇心啦！點知又比我學到野，原來跳槽連升3級不是夢！

 

 

　　呢位同事嘅career path認真麻麻！畢業於三大，但因為修讀科目「搵唔到食」，二年唔相關工作經驗下轉行，走左嚟現今公司做executive，welcome to 小薯一族！雖然身為小薯，生命、時間、精神等等都被上司蠶食左唔少，但同事嘅野心沒有絲毫減低。

 

　　「著到咁，今日又去啊？」

 

　　「係呀，照舊如果有咩事，幫我擋一擋！我好快返！」

 

　　「好！今次又見咩post，邊間呀？」

 

　　「product manager呀！」

 

　　M位？executive、senior executive、Assistant manager，我心入面數一數，連跳三級喎！ 「Product manager？你有經驗咩？」

 

　　「佢話要四年工作經驗，我send過去都係搏一搏咋，點知都叫我interview !」

 

　　「咁你準備左未？呢個post要識programming同唔同software架喎！」

 

　　「冇啊，咪坦白同佢講唔識囉！」 「吓？你乜都唔準備，憑咩覺得人哋會請你？」

 

　　「坐得呢個位，不嬲都乜都唔識做㗎啦！啲細嘅識做，捽佢哋咪得囉！你睇下阿姐！到時Interview，緊係講啲宏觀野，講我嘅遠見出嚟，等人地覺得我可以用條Team去幫佢賺錢，而唔係好似而家咁，默默做細嘅，幫啲上司領功！」

 

 

　　同佢交談完，雖然我唔太同意「未學行，先學走」。但始終路係佢揀，想點行，外人唔應該干涉。所以我就諗住放長雙眼，睇吓有冇公司真係buy佢個套，願意請個「乜都唔識做，但車大炮了得」嘅公司中層。 

 

 

　　兩個星期後，同事真係遞信！查問之下，原來間公司真係俾咗Offer佢，仲要就算唔夠經驗，都冇改佢Title！真係好想知道同事究竟點樣將佢宏大嘅Idea present出嚟，令到interviewer願意請個「乜都唔識做」嘅人為中高層；同時，我亦都好驚訝原來呢招「好高騖遠」係work嘅。不過，呢個同事都提醒左我一樣野。就係年輕人唔使太自我貶低，有時越級挑戰，反而可能俾你挑出一條生機！反正，挑戰失敗又唔會洩底嘅！有機會，去啲唔太想做嘅公司見工，不妨試吓呢一招，話唔定有意外驚喜！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇