2018-01-18
【史上最大騙局】去旅行散心，無恥同事技巧呃貴手信
去旅行係唔少香港人嘅精神食糧，去得旅行無非都係想抖啖氣relax吓，但相信有去過旅行嘅打工仔，都會因為「手信」呢個問題煩惱過！今次花生文，揭發公司有多名高手段嘅騙徒，為咗手信，無所不用其極，佢地真係唔坐Office，出去行騙都可以發達！即刻睇吓受害者點中招，為自己防備一下！
Case 1 : 尷尬同好，搏你唔敢出聲！
時：秘密時間
地：日本
人：年青精壯男人兩個
第一個case嘅受害人叫Jerry，因為佢要請假去日本洗滌心靈，而喺向另一個男同事安排跟進工作時，被佢知道將會出發日本之秘密。加害者立即出招：
「請咁多日假，去邊啊？」
「同女朋友去日本咋！」
「日本？喂！拍爛檔幫我睇下有冇『明日香個杯』啊！」（細聲）
「呃⋯睇到我就幫你睇喇！你知啦，同女人去買呢啲唔係咁好！不過我盡睇喇！」
直到Jerry回歸之日，眾人紛紛收到零食小手信，唯獨Sam得到零食之餘，仲收到個已包裝好嘅物件。Jerry怕呢啲「識飛嘅杯」尷尬，所以細細聲同Sam講左句：「包野$300啊！」。此時，加害者露出真面目，竟然大大聲係其他同事面前講：「你係咪有用過啊？好唔好用啊？ 果然識貨啊！」嘩！講到咁，其他人實好奇呢包咩黎啦！怕羞仔嘅Jerry冇啦啦畀人捧左上神枱，成為「杯神」，當下忙住搵藉口，將「杯」變左藥膏，向同事隱瞞事實；而加害人Sam就拎住戰利品逃之夭夭。事後，Jerry都廢事Sam再出陰招，寧願保住自己乖乖仔嘅形象，蝕$300當畀乞兒。
Case 2: 匯率精明眼！
時：外幣價格浮動之時
地：歐洲
人：精算女同事、唔忿氣旅行家
第二單騙案嘅受害者Sonia鍾情去歐洲shopping，而加害人Apple就疊單叫Sonia幫手買個袋。Sonia為人有交帶又安全，去到名店直頭同Apple視象，畀佢睇下現貨有咩款、及價錢，諗住雙方面對面傾好哂，你冇得走我數啦！直到Sonia帶住名牌手袋返香港，你估都估唔到嘅事發生：
「唔該哂你啊Sonia！個袋€3000歐羅，計返今日匯率，呢到$31500港幣！」
「呃…今日匯率幾多啊？我去嗰陣乘11架。」
「吓？今日乘10.5喎！緊係計今日啦，我今日先收到架嘛！一係我去唱錢，畀返€3000歐羅你，咁咪夠公平囉！」
「唔係咁計喎，咁我真係用左$33000港幣幫你買，而家歐羅貴左，冇理由要我蝕差價架喎。你畀返歐羅有咩用，我短期內都唔去歐洲…」
「總之嗰陣傾好左個袋賣€3000歐羅！而家你想要歐羅定港幣？港幣我只會畀今日匯率你！」
最終，兩個人緊係嗌交啦！仲差啲搞到報警添！事實證明左，存心要呃你嘅，無論你做咩防禦措施都好，都係會畀人呃。所以，打工仔去旅行最緊要低調出發，聽到有咩不利嘅要求仲要學識選擇性失聰保護自己！
《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。
想要獨家投資理財Tips？即Like etnet 全新Facebook專頁► 立即讚好
