隔離Team借人，奉旨幫佢OT？

　　平時返工朝九晚六，不用OT已經值得擺幾圍慶祝，遇著一些日子必須準時六點收工，一般打工仔都會「有咁chur得咁chur」，趕在收工之前完成手頭上的工作，然後準時6時走人。當你終於做完所有工作等收工，此時隔離Team問你阿姐借人，你又不幸被選中，你會怎樣做？還是你可以怎樣做？ 

 

 

　　話說，同事W有事要準時6時收工。當天她一直默默地做，連Lunch也只是買外賣，邊食邊做務求快點完成走人，衝到5點45分終於達標完成，豈料此時marketing的人突然向阿姐借人，要求兩個人手幫忙剪紙，可憐的她就被選中及帶走了。就這樣，消失的同事W直到6時也沒有回歸，而我，也收工走人了。 第二天查問同事W的跨部門合作，同事W竟大發雷霆，矛頭直指marketing的人！ 

 

 

　　「痴線㗎，我琴日成7點先走！」 

 

　　「其實做咩嘢咁趕呀？」 

 

　　「做埋啲無謂嘢！幫marketing班人剪卡！！講到咁趕，成5點9先借人，我以為成個marketing總動員都唔夠人先借人啦！點知去到得我同另外一個同事剪，其他人冇幫手照做自己嘢囉！！」 

 

　　「吓？咁點解佢地唔做？」 

 

　　「係囉！！擺明自己唔想做就叫其他人幫佢做！仲有呀，要人幫佢剪嘢，剪刀又唔準備比人！大佬呀，我唔係你條team啲人，點敢自己係人地地頭亂用人啲嘢呀？仲有呀！7點未做完㗎，我夾硬走㗎！我剪完project A啲卡之後，佢仲叫我休息下等一等，project B啲卡就快印完！我緊係話「未搞掂咁我走先喇！」即走啦！仲想我幫佢OT呀？」 

 

　　「project A同project B都唔係我地負責㗎喎，點解要我地剪？仲有，準備卡呢啲唔係marketing自己負責㗎咩？點解要我地做？」 

 

　　「就係囉！！阿姐乜都唔理！人地話要人就派我地出去頂！淨係想幫自己做image！」 

 

　　雖然當阿姐派同事W給marketing差遣時，同事W不表明6時必須離開的意向，自己都要負責。(可惜在某種公司，說了私人理由都不能違抗皇命，即是焗住做！) 但這件事上，可看出阿姐究竟有沒有「攬」自己人的心，還是隨便把自己人交給其他Team做牛做馬。另外，marketing的要求也太過份。你們負責準備的宣傳物料，為甚麼要由其他人去幫你們做，有替身後自己卻抽身不理？如果真的趕到不夠人，你向隔離Team借人一起做都尚叫合理，但marketing借完人卻全交給他人，未免有點太卸膊。而且還要處理不是自己Team負責的project就更加說不通。 假如下次臨收工，阿姐又將你借給隔離Team，其實應該一開始就表明「可以幫手，但有事要做，必需準時收工走」，好讓鄰Team有時間找第二個幫手，幫你找「替死鬼」。而且，要學會拒絕。給別人一個「你不是所有不合理的事也會做」的印象，讓他人知道下次再有不合理的要求也不會找你，否則阿姐會認定你是幫得手之人，下次有事也會找你去幫忙。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【年度感謝祭】維柏健及natural Factors全線2件7折► 了解詳情