執筆之時，新一屆立法會選舉只係有超級區議會未有結果，但泛民贏返一仗已經無懸念，保得住最重要嘅三分一否決政改權，同埋直選界別過半數防止建制修改議事規則。

　　今屆選舉無論係投票人數以至選舉結果，都完全超出市場預期，最主要係受到最後兩日泛民喺雷動計劃集體棄保嘅策略影響。雷動計劃刺激咗泛民選民，特別係沉默大多數空群而出，推高非建制派嘅得票率，建制派始料不及；其次就係推咗幾個選情一向穩陣嘅候選人懸崖，而王維基更加跌咗落去，充分顯示泛民經過咁多年，配票仍然係打亂章，毫無系統可言。

　　選舉結果有兩大啟示。第一就係泛民拉布對抗政府嘅被動式進攻係得到泛民支持者「註冊認可」。建制派同梁特政府，一路以來打泛民嘅議題就係拉布影響施政同民生，更倒咗唔少豆豉鯪魚落海；但今次非建制派得票大躍進，直選票王同超區票王都係由非建制派奪得，已經向建制同政府表明，拉布係被認可嘅抗衝現有制度嘅方法，日後建制陣營再打拉布牌效力將會大降。

　　第二個啟示，一如所料，選票證明泛民老面孔已經鉛華盡洗，以往嘅票王如長毛都係僅僅夠票入閘，選票全線流向新丁之手。雖然新丁票多係受到雷動計劃嘅部分影響，但珍盈就唔相信雷動可以動到朱凱迪八萬幾票，所以好大程度都反映出，泛民選民係求變，希望議會有新人事，帶動新作風。

　　最大嘅問題係，新丁會變得出咩樣呢？不滿制度而走入制度嘅人，可以點樣跳出制度呢個框框？如果政府唔通返現時塞咗嘅溝通渠道，反對派最終可以用嘅武器，仍然都係拉布，仲會比過去四年更加拉得天昏地暗，最終四年之後四年，香港又會有咩得著？主動權仍然在政府手中，問題係，邊個可以做呢個「通渠佬」（定係「通渠婆」）？希望下年3月有曙光。　

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情