2016-08-31
老泛民將被市場力量淘汰
今屆立法會選舉有個好明顯嘅現象,就係「新陳代謝」;無論係泛民定係建制,都步入換班時間。好似民建聯四大長老都齊齊退出,四個人仲整段「打雀論後輩」嘅影片喺facebook宣傳,唔少民記嘅支持者都畀晒Like。
泛民都有「長老」級人物退居幕後,好似民主黨劉慧卿、何俊仁,人民力量陳偉業等等,全部都退到去名單嘅第二位抬橋;知「老」而退,等政壇可以由新生代接捧。不過仍然有幾位老泛民,可能立法會議員嘅光環戴得太舒服,係都唔捨得退落嚟,隨時面臨落選嘅命運。
以新界西為例,民協馮檢基由老巢九西空降,呢個區所做嘅選舉論壇,特別係論壇之後吨傳媒報道,阿基全不在傳媒焦點,曝光率低無可低。而佢在港大民研嘅民調入面,支持度亦都長期低迷,最新一次民調只有2%,隨時繼區選墮馬之後,完全絕跡於香港所有議會。
阿基上屆係透過超級區議會入局,正正因為上年區議會墮馬,此路不通,理應選擇喺呢個時候唔選,又或者返去九西抬橋。但民協呢個老政黨,諗住九龍西增加一席譚國僑應該穩陣入閘,而阿基又想繼續用佢嘅褪色光環入立法會,冒險轉區去新西,依家最終可能兩個齊齊墮馬。如果真係出現呢個局面,唔係民協自己高估咗自己黨嘅號召力(但其實阿基過往經常打告急牌),就係佢哋低估咗選民求變嘅心態。其實依家選民心態同十年前已經有好大出入,唔同建制派支持者,泛民以至激進派選民,唔單止要求候選人要變,更可能連政黨都要改變,才能迎合到「市場」。一眾老泛民仲係戀棧過去十幾廿年嘅光環,注定被市場力量淘汰。
*編者按:2016年立法會新界西選區候選名單包括:黃潤達、尹兆堅、高志輝、周永勤、鄭松泰、鄺官穩、田北辰、何君堯、梁志祥、郭家麒、黃浩銘、李卓人、黃俊傑、麥美娟、馮檢基、陳恒鑌、張慧晶、呂智恆、湯詠芝、朱凱迪。
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
《說說心理話》【驚恐症來襲】無預警發作...患者親身講述得病經歷及康復過程!必要時自己做一件事可幫到手!► 即睇