仲有兩個多星期先到選舉，但告急牌已經掛得比百貨公司嘅「大減價」牌更加多，好似真係唔好蝕底咁，鬥快告定急、鬥快七情上面話自己選情嚴峻，希望可博到同情票。

　　喺選舉之前，唔少網民投票估計今年嘅大輸家會係民主黨，一來係新舊交替，老面孔黨員光環無晒，新面孔知名度亦都唔夠，接唔到班。不過民主黨話晒都有唔少老本食緊，加上地區工作點都叫紮實，有一班「和理非」固定支持者，爛船三斤釘，議席跌就預咗，但話佢地會係大輸家，似乎都只係憎民主黨嘅人過多嘅情感投射。

　　其實成個非建制陣營，定位最不利嘅係人民力量同社民連聯盟。呢個聯盟各區都有人出選，佢地面對最大嘅困境，係佢地本身嘅支持者普遍係行偏激路線，本土派抬頭之後，支持者只有走向更偏激，人社即時做咗三不像，既無「和理非」支持，又無激進嘅撐場。依家面臨嘅困局，係五區入面只有長毛梁國雄嘅民調守得穩，其餘參選團隊隨時全軍覆沒，亦難怪佢地「反民調」係最大力。

　　建制方面一樣會有輸家，而我估計最大機會係自由黨。自由黨兩張名單分攻新界西東，新界西知名度極低，擺明都係陪跑；新界東有抽水王田北俊做明星綠葉，諗住托起後輩李梓敬上場。

　　珍盈行親去大埔沙田，幾乎都只係見到田北俊個名，完全忘記咗排第一先係李梓敬，不過似乎都係無補於事，民調顯示李梓敬喺當選同唔當選之中徘徊，一個唔小心輸少少拎唔到議席，成個黨直選就可以話全軍覆沒，得返幾個功能老將鎮守。

　　缺乏阿爺關照、直選又得唔到選民認同，前景的確係堪憂。

*編者按:新界東候選人名單:

1.方國珊、2.林卓廷、3.廖添誠、4.陳云根、5.梁國雄、6.張超雄、7.楊岳橋、8.麥嘉晉、9.鄭家富、10.葛珮帆、11.侯志強、12.李梓敬、13.鄧家彪、14.范國威、15.陳玉娥、16.黃琛喻、17.李偲嫣、18.陳志全、19.梁頌恆、20.梁金成、21.容海恩、22.陳克勤。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】財政預算案展開公眾諮詢，學者倡問責官員減薪並削減公務員編制，你是否認同？ ► 立即投票