巴西最後天海一色

　　決賽前夕，阿根廷球迷大舉殺到Rio（里約熱內盧），你會以為呢度係阿根廷國土，皆因當「巴西71國殤」後，即刻少咗好多巴西波衫響街出現，加上巴西今屆一場波都未試過響Rio踢，同呢個決賽城市有緣無份。

街邊紮營嘅阿根廷fans嘻嘻哈哈，好似笑緊住酒店嘅朋友係傻瓜！

　　諗番四強前同家明哥（郭家明）做訪問，佢身份係FIFA技術小組委員，所以對決賽嘅預測只能保持中立，但佢話希望係由一隊歐洲隊對一隊南美洲，結果得嘗所願，仲有隊南美隊入決賽，所以Rio市面都叫做有一番熱鬧。但始終係隔籬鄰舍，過境就如去郊外旅行，所以阿根廷人多過香港嘅自由行！

　　首都巴西利亞上演嘅季軍戰昨晨打完，巴西又大比數輸多場，傷盡球迷心，當我哋又煞有介事驚有事發生時，就發現在場球迷都識比掌聲今屆由頭到尾都咁搶鏡嘅荷蘭，而Rio街頭睇完大電視嘅球迷，埋怨幾句後都和平散去，成熟表現有風度，值得其他成日賴地硬嘅球迷學習。

　　我響決賽後即晚搭夜機返香港，巴西之旅畫上句號，無論阿根廷輸定贏，都只能匆匆感受一下喜與悲，為延長開波前嘅興奮同期待，我決定徹夜不眠寫Postcard，似乎好老套，但收到嘅朋友好開心㗎，然後響天光之際，會落去沙灘旁睇下瞓街嘅阿根廷Fans醒咗未，say個hi之後就剝衫剝褲，游番個暫別嘅Rio水，享受下最後嘅天海一色。個天，如無意外應該係藍白色！

轉載自晴報

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇