七一睇到我腳仔軟

　　七一啱啱響聖保羅坐完過山車，響球場上又高又低咁又喊又笑，皆因阿根廷雖然叫做控制戰局，但係攻極唔入，仲比瑞士不時反攻嚇餐懵！

 

場場16強都加時咁滯，想嚇死我咩？

 

　　球場七成係阿根廷球迷，瑞士一成都無，但同佢哋隊波落場踢一樣，控球唔要、射門唔多，目標就係一個：互射十二碼。到時睇下個天幫邊隊囉！

 

　　我有傳媒證，可以坐上傳媒座位，不過一來太遠，二來傳媒朋友太冷靜，所以我寧願揀落去觀眾席，雖然冇位坐，不過可以行來行去睇下眾生相，有趣得多，仲可以隨時走位。

 

　　我上半場先企響瑞士龍門後面，隔籬左右都係自動搭訕嘅阿根廷fans，當中都有巴西人。哈，原來都有巴西人撑阿根廷㗎！不過其他巴西人都係嗌瑞士個名就真！

 

　　下半場我去到另一邊龍門後面，繼續近距離見證阿根廷攻勢！查實美斯換邊後搏命咗，但瑞士銅牆鐵壁，撞極唔散！話都冇咁快就完場，加時我都唔係太驚，阿根廷都係撳住嚟打，怕嘅就係怕十二碼。

 

　　響加時期間，我諗咗好多無謂嘢，出局點算？美斯下屆31歲，我睇咗阿根廷出局幾多次……直到完場前兩分鐘，美斯搵到條罅交比迪馬利亞，噩夢先完結。而諷刺嘅係迪馬利亞其實全場屎波，除咗最後呢腳！

 

轉載自晴報

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇