「美斯3.0」對雲高爾

　　「美斯係全世界最好波嘅球員，不過巴西會係世界盃冠軍！」以上說話來自一位巴西球迷，可以證明美斯係冇人唔鍾意，今屆佢可以去到幾遠呢？

 

美斯倘領軍打入決賽，複製老馬傳奇只差一步。

 

　　我睇咗美斯踢三屆世盃，首屆2006年佢18歲，乳臭未乾冇人靠佢，後備上陣入咗一球，叫做吸收下經驗。2010年馬勒當拿做教練，錫到美斯燶，仲識得幫佢減壓，話隊長馬斯查蘭奴先係重心，等焦點唔駛響晒美斯度，「美斯2.0」做墮後校炮，冇波入但貢獻唔少，希古恩有4個入波都要多得佢。不過八強一落後比德國就即刻顯出慌失失奇兵嘅醜態，足證美斯鬥心仍不足。

 

　　今屆美斯已提升到「3.0」，26歲心態終成熟，冇咗成日傻笑嘅陽光男孩look，換上全神貫注愁眉深鎖嘅cool樣，大男孩蛻變大男人係冇咁純真，但佢明白天將降大任於你，要孭得起、就係要呢個態度！

 

　　有人話美斯踢得hea唔肯走，其實你細心睇下，佢由靜止到全速，隨時快過你部法拉利，要保持能量高速捕獵，就要識得一係保持體力，二係瞄準最有利位置同時機，唔郁唔代表佢冇做緊嘢！大自然嘅獅子老虎，響全速捕殺之前亦唔會點郁，以免打草驚蛇，呢種就係「Messi style」！

 

　　仲有一樣數據不可盡信，就係近年常見嘅球員跑動距離，成日話美斯跑得少，有冇留意到高速跑同緩步跑，其實係兩回事。咁請問又點可以用一個數字，就畀你看透世事吖！

 

　　「美斯3.0」今屆已ready，如果世盃係一人比賽，佢贏晒。不過足球係團隊運動，所以今夜四強都係荷蘭機會高啲，因為佢哋打多人一個，多咗雲高爾！

 

轉載自晴報

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇】9歲泳手一度被拒參賽，議員指泳總執委會長兼任上訴委會長欠公正► 立即投票