巴西出局肯定暴動

　　嚟咗巴西個幾星期，去過幾個城市，睇咗幾場大戰，對巴西嘅睇法，同我之前未出發前幾唔同。

 

世界盃係巴西人嘅精神鴉片，不過唔知藥力有效期有幾耐。

 

一，周街係賊

 

　　touchwood講句，到埗以來一齊都安好，貴重同唔貴重嘅物品一件都無唔見過，當然本身我哋都係特別打醒十二分精神，我嘅策略係所有重要嘢都跟身，永遠都望得到就放心嘞。酒店房呢晚上當然可以用嘅鎖都鎖晒，再搵張凳頂住門口，正所謂夜半敲門也不驚嘛，然之後呢盡可能唔使執房，咁又少個機會唔見嘢。

 

二，打倒世界盃

 

　　開波前有唔少示威抗議，開波後唔係無，但少咗好多，好明顯足球係巴西所有問題嘅麻醉劑，頂得一陣，世杯之後會點無人知，但起碼呢排巴西隊波順風順水的話都仲OK嘅，不過噚晚畀墨西哥逼和，已經話有憤怒球迷向隊巴擲石頭！《晴報》編輯大哥話萬一巴西有日出局會唔會暴動？我諗肯定會，所以我希望呢日遲啲嚟。

 

三，好熱定好凍

 

　　巴西真係處於冬天，不過南北溫差好大，南方十零廿度，北方三十幾度，所以唔算好凍，但係又可以好熱，睇你響巴西邊頭囉。

 

四，好鬼遠

 

　　真係好遠，搭飛機之痛，在於要轉機，由香港去巴西一定要轉機，你只能夠揀響邊度轉，杜拜又得，南非又得，北美亦可，但都唔會有捷徑㗎嘞。去到巴西國內城市之間固然又要搭飛機，仲隨時又要轉機，無謂反抗，你可以揀嘅只係響機上邊等轉機，定落機兜個圈去廁所，不過結果都係一樣。

 

五，周圍有人跳森巴舞

 

　　肯定係諗多咗，不過巴西人其實都幾熱情，成日主動打招呼講「Ola（葡萄牙語嘅Hello）」，唔似得我哋香港人對住尊貴嘅遊客，唔歡迎不特止，仲成日怕人哋「屙嘞」！

 

轉載自晴報

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【年度感謝祭】維柏健及natural Factors全線2件7折► 了解詳情