場內場外都開波

　　嚟到巴西世界盃開波之日，終發現今屆與別不同，原來今屆喺一個要計數、要討價還價嘅世界盃！

 

揭幕戰聖保羅球場起咁耐，都係多得工人「拉布」討價還價嘅結果。

 

　　都啱嘅，響當今商業世界，凡事一講價值，二講timing，你有價值又啱timing嘅話，就要風得風嘞！原本世盃就係每位球員期待以久嘅大舞台，未成名嘅博上位，上咗位嘅更要博上一層樓，有料之人夾啱大家嘅目光，咁就要乜有乜嘞！

 

　　好似尼馬咁，今季轉會巴塞隆拿雖表現一般，但響國家隊孭到飛，咁就成希望嘞，呢次如果一如坊間估計巴西順風順水入決賽，世界足球先生有佢份。

 

　　至於另一人辦美斯仔，響巴塞呼風喚雨，但過去兩屆世盃只入得一球，就係揀唔啱timing去搶鏡囉！有人話佢一日唔為阿根廷攞世界盃，都唔配叫做真正球王，苛刻得嚟又係有道理嘅！

 

　　巴西係足球強國，踢波人口冠絕全球，估唔到唔係踢波搵食嘅，都一樣識得把握時機為自己製造更多價值！食正世盃期間，各行各業都懂得搵個民怨沸騰為原因，唔係抗議就係罷工，目的就好清楚，係借呢個政府唔輸得嘅時間，盡情爭取多啲回報。先有警察後有老師，都成功幫同業們爭取到更多回報，然之後就到地鐵員工，見你去球場要靠晒地鐵，唔罷工等幾時？

 

　　不過地鐵同事大咬得滯，要求加薪幅度太大，所以逼番政府出辣招炒咗幾十個帶頭分子，咁又嚇番班打工仔轉頭，乖乖復工！

 

　　呢場勞資大戰戰況激烈鬥得燦爛，不過暫時睇落兩隊都贏唔到，一街都係輸家，包括剝花生嘅球迷們！

 

轉載自晴報

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

夏日中暑高風險！即睇中暑迷思＋預防措施！► 立即了解