未出發先say hi

　　即將出發去巴西，一路準備呢個世界杯嘅行程，一路暗笑自己嘅無知，乜原來巴西大到咁，成半個南美洲嘅領土係佢嘅；乜原來巴西咁多人，全國兩億人口響世界排名第五，噢，大鄉里真係要出城嘞！

上屆南非世杯現場，香港人見一個攬一個。

　　多得TVB嘅任務，未來呢個幾月我都會一路留響巴西，直到新一屆世界杯冠軍出現先返歸。咁沿途我會遇到啲乜嘢有趣嘢，撞到邊位球星，睇咗邊場激戰，以至有冇咁好彩畀賊阿哥睇中嘅特別經歷，我都會響呢個專欄話畀大家知。

　　準備出發之際，收到最多嘅問候係「巴西好危險」。係，我同你一樣日日睇新聞都見到巴西暴動抗議罷工嘅消息，擔心係有嘅不過唔多。

　　因為多得上屆去過南非，而當時其實大家傳南非好危險嘅新聞仲多過今屆，我哋作為唯一嘅香港傳媒，興奮少少，肉緊多多，仲好記得第一下落機到達約翰內斯堡，成team幾位兄弟圍住一齊行，中間夾住一個高海寧，大家嚴陣以待，慌死一出閘就畀人搶嘢，結果？哈，安全過今日嘅香港。

　　上屆香港人好聽政府話，黃色旅遊警示下冇乜人飛過去睇波，所以當時響異鄉見到香港人都好似萬里尋親咁又攬又抱，預計今屆情況應該會好啲，家陣已經有啲朋友同我夾緊期相見，甚至傾下偈做下訪問啦。準備去巴西嘅朋友，快啲通知我！

轉載自晴報

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》【親子溝通】怪獸家長原來都有呢啲通病！相處有一件事切忌？► 即睇