呢兩星期，公司附近出現一幕幕「美景」。白棉花散落滿地，花白叢中有點開，盛載住木棉樹嘅生命承傳，風起時，半個藍天被透薄的白絮遮蓋，香港難得見此仙境，我已經忘記咗自己有鼻敏感，照停低用相機捕捉飄絮美態。只不過，美景背後，危機四伏。 

　　氣候變化愈趨嚴重，天氣近年就如神經刀，時而暴雨交加，時而日日乾蒸熱到嗌救命，唔止人辛苦，睇氣候做「人」嘅花草樹木，都畀天氣搞到笠笠亂，「生理時鐘」錯晒。木棉飄絮，或者就係最有力嘅佐證之一。早前有傳媒報道指，香港嘅木棉樹以往一般喺3月至4月開花，並喺開花後一星期就完成飄絮過程。但今年冬天幾乎冇凍過，木棉樹唔識落葉，時鐘錯亂，最終去到5月尾先開始爆發種子，而且飄絮期明顯延長。 

　　百感交雜嘅夏雪之景，令我諗起過去幾年都有人向政府投訴棉絮引致敏感同埋衛生問題，而政府嘅處理手法就係揮劍斬樹，或者除去木棉花同果實，做其他嘢唔見咁快，斬草除根最快手。一搜尋資料，就發現市區唔少木棉樹，原來都係政府栽種，志在綠化環境，但種完樹，又唔畀人開花結果，「又要馬兒好，又要馬兒不吃草」。

　　有此先例，當見到日前大埔鷺鳥林被斬殺嘅事件，痛心嘅同時，我實在唔驚訝呢個政府會做呢啲嘢，因為港府對生命嘅尊重，一向都近乎零，動植物只係呢個城市嘅陪襯品，但一出現喺部分「人類」不能接受嘅範圍，就要趕盡殺絕。剩係數白欖都已經係一地案例，2015年8月，般威道石牆樹喺健康良好嘅情況下被斬去，百年樹蔭一夜間蕩然無存，成為樹木辦無盡力做好路邊樹木同行人安全之間平衡嘅犧牲品；西貢、大嶼山南部一帶遍地牛牛，佢哋本身就係當地「原居民」，一向都相安無事，人牛共存，但近年間唔中就聽到政府派員將牛牛逼遷，就係為咗人類一己私慾做發展。

　　不過，政府唔係呢件事上面唯一嘅兇手，動輒投訴嘅人同樣係幫兇，甚至係呢種「眼不見為乾淨」文化嘅始作俑者。投訴嘅人大多都認為，所有野生動物都污糟，樹木只宜觀賞，不宜接近我隻窗，嘩我病咗呀，肯定係因為附近又雀屎又棉花飄嚟飄去搞到我條氣唔順啦，所以專業嘅投訴人一開咗個Case，就會不停催促區議員、政府部門盡快跟進，咁最快嘅方法係咩？咪就係斬斷同動植物嘅聯繫。如果唔即刻做？你聽日喺XYZ報個投訴版見啦！

　　有指今次大埔殺雀事件，係由於有居民向區議員投訴嗰條路有好多雀鳥糞便而要求部門處理，唔知道嗰位投訴嘅人，會對於從此再冇雀糞困擾佢而高興，定係會為9隻幼鳥無辜死亡而有一絲惻隱？

　　需知道香港本身係一套好完善嘅投訴機制，但冇一套保護動物，令動物同人類共融嘅制度。今次事件有好多好多解決方法，例如喺該段行人路搭建上蓋，或者先請相關專業人士協助遷移鳥巢，最重要，係畀時間人哋去解決問題。請大家投訴前，諗清楚，你寧願好急趕咁成為殺動植物嘅兇手，抑或用一啲時間，一齊諗方法，等自己積德，又放一條生路畀無辜嘅小動物？

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

樂本健【年度感謝祭】維柏健及natural Factors全線2件7折► 了解詳情