特首呢份工唔易做，每日除咗要諗吓點樣接待外賓、為施政謀篇佈局、搵吓邊塊樹林適合做破壞，又要花盡心思保住自己個位、點樣對付政敵、物色吓邊個忠心耿耿嘅黨的僕人啱做自己條針、鑽晒制度嘅漏洞去為自己爭取最大利益，難怪呀689先生5年前仍然係一頭黑髮，到今日行將卸任、水鬼升城隍之時會變得一頭白髮，真係令一眾梁粉倍感傷心。

　　但心魔弄人啊，一件UGL事件，令曾經話過自己每晚都瞓得好好嘅689冇得抖吓，去完大灣區考察返嚟，夜媽媽十點幾十一點仲要幫自己條針改文件，親力親為，為咗全香港人關心嘅問題而勞累，真係辛苦晒你啦。

　　有說「針無兩頭利」，呢支梁粉針就唔同啦，兩邊都鈍嘅，刺唔穿立法會專責委員會嗰一邊嘅情報，轉過頭因為太鈍，而反彈返落689度，以一份未經潤飾嘅文件，泄露「CEO-CE」呢部電腦嘅主人──689以無形之手，干預立法會調查委員會，意外刺破「梁先生」嘅詭計。

　　詭計被揭穿，佢都無退路可言，唯有硬住頭皮撐到底，用盡一切語言偽術為自己辯護，包括係「畀意見」、「溝通」、「嗰份係公開文件」、「受調查者有權對調查範圍提出意見」等等等等，又有傳要求周浩鼎無論如何都要繼續留喺委員會內。甚至係反咬民主派一口，指控佢哋公開保密會議內容，以及梁繼昌身為誹謗案被告參與委員會係有「利益衝突」，要求立法會跟進，面皮之厚無可比擬。

　　撐到咁行，只因今次有真憑實據。以往，幾次傳出梁生疑似濫權嘅事件，例如記憶猷新嘅「行李門」、廉署李寶蘭風波，保皇黨們都可以用各種理由輕輕帶過，當中最強嘅武器，就係話相關指控只係猜測、傳聞，無真憑實據證明梁振英有直接或間接向對方提出一啲超越職權嘅要求。但今次就唔同啦，整份文件所有修訂原封畢露，幾點鐘改、改過啲咩，全部喺追蹤修訂一覽無遺。

　　梁振英辯駁，指佢改嘅範圍係為咗要令調查更全面，以防出年完成調查後有人會話「放生梁振英」，但細緻咁睇，佢嘅修訂係為自己甩身鋪路，例如加入委員會要定義基本法第47條，要求官員就任時申報財產嘅原意，以及強調澳洲傳媒報道嘅協議文本真偽。司馬昭之心，路人皆見，更何況，從一開始，佢私底下同委員接觸已經違反常規，用最簡單嘅比喻，就係疑犯干擾法庭，有藐視法庭及妨礙司法公正嘅嫌疑，只不過，立法會冇呢一條規矩咁解。

　　至此，梁振英以現任行政長官、受調查對象身份，干預立法會獨立運作已成既定事實，無論佢用咩措辭推搪，都否定唔到佢同周浩鼎係打龍通，亦令人懷疑，喺立法會裏面仲有冇梁振英嘅扯線公仔？

　　而家保皇黨一方忍痛「殺鼎鼎」，「蠢豬」周浩鼎政治能量一鋪清袋（雖然本來都已經無乜），都唔代表事情終結。點樣確保未來立法會嘅調查可以跟返程序公義進行？唔計UGL，梁振英呢一件事上面真係無手尾要跟，無任何責任要負？呢啲問題全部都要有人繼續追，否則，香港任何制度防線，都可能繼續被更上一層樓嘅梁振英玩謝。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇