今屆立法會，多咗一群「正義之師」，以法律之名，為政府相關嘅法律爭議保駕護航，當中佢哋唔少都曾經親口證實，或者被傳出獲得中聯辦嘅祝福。行動綱領好簡單，就係確保法律係為政權服務。

　　呢群「西環律師團」喺呢半年，喺立法會取代泛民幾位大律師，成為一眾建制fans成日掛喺口邊嘅「狀棍」，成為部分傳媒發問法律問題時候嘅新寵兒。舊年立法會換屆後，律師會嘅刊物仲特登用一個封面報道，好威咁介紹幾位建制派新嘅律師議員，風頭真係一時無兩。

　　亦因為咁樣，而家並唔難喺新聞上見到西環律師團嘅身影，因為正如其中一位曾經接受訪問，話泛民嘅律師經常提出似是而非嘅法律觀點，所以佢哋當選後，希望可以澄清一啲法律觀點，所以，佢哋要keep住出聲。例如，一位已經連任兩屆嘅「大家姐」，早前就撰寫私人草案，推動辱警罪立法。又例如，中央針對梁游提出釋法，消息傳出前佢哋會話相信香港嘅法庭可以自行處理，到中央急急腳決定要喺法庭審判前就釋法，佢哋就會自動波為中央講好說話，強調唔會破壞法治。唔單只係法律方面嘅專家，仲係強而有力嘅球童，隨時ready幫手搬龍門。

　　喺UGL調查委員會呢件事，西環律師團大放異彩，11名調查委員，7名係建制派，律師團佔當中5人，每個人都有唔同定位，比較老經驗嘅法律超人，努力充當中間派嘅角色，成為委員會主席，上面提及過，出面推動辱警罪立法嘅滅鼠專員，就比較沉靜，等待適當時機先出聲。兩名新丁就樂於做喜劇演員，喺早期為調查委員會增添樂趣，其中容嬤嬤仲同超人主席曾經就調查範圍內哄，被超人反唇相譏，令超人加咗唔少分。 

　　雖然(前)明日之星、新晉契仔喺「打籠通」事件陣亡，但唔緊要架，同一條team丫嘛，做啲咩都一定有人攬嘅，經過兩個星期，一眾律師團都決定槍口對外。同受調查對象「打籠通」唔會破壞互信，反而對家公開有人「打籠通」就衰啦，會搞散個調查啦，仲提出要簽一份法定聲明，保證之後唔會再洩密添。

　　將黑講到變白，將死都拗返生，佢哋嘅議政能力毋容置疑。不過佢哋嘅舞台又點只喺呢個委員會？未來幾年，大家仲有排睇佢哋表演，尤其是最落力演出，唯一喺選舉後公開多謝過中聯辦嘅何君堯，睇住佢每一次嘅出位言論，單人力挑過社工、法庭、同志團體、全部嶺大學生，同埋任建峰，我相信佢會繼續發光發熱，令香港人嘅怒氣有增無減。

　　西環律師團最大嘅成就，就係令律師呢個行業嘅形象，變得更加多元。唔再好似以前，泛民政黨嘗試樹立嘅專業、沉著、能言善辯等等特質，獨霸咗坊間對政壇律師嘅刻板印象。西環律師耳目一新，令律師嘅形象變得更加多元，令人讚嘆：「嘩，原來咁，就做得律師㗎嗱？」

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

樂本健【年度感謝祭】維柏健及natural Factors全線2件7折► 了解詳情