2016-12-16
【蔣麗芸的鬱悶】一招「望住我講野」KO鄭松泰
689落馬,日日黑面示人,盛傳係因為大陸斬攬,令佢心有不甘,而梁粉當然亦不好過啦!
有長期梁粉就喺本人上篇特稿留言,話「CY落台,思歪也無得撈了」;又指「思歪」係最唔想CY離開的人,我鍾意對號入座,估計該看倌意思係指筆者思畸要離開了。
首先佢連我個名都已經搞錯啦,以梁粉嘅水平,毫不意外。其次,689走咗,就會無晒荒謬事?哈哈哈,「CY一走,就冇晒問題」嘅心態,估唔到連保皇的粉絲都根心蒂固啊!少年你太年輕了,我先無咁天真,制度依然,點會因為一個惡人落台而改變?
另外又有個留言,話本人事事「賴落」梁振英度,「佢走咗仲可以將問題賴去邊個度?」好搞笑嘅邏輯,我點會只係話689?梁粉要負嘅責任都相當大架嘛,係咪?冇你哋去支持呢個封建思維嘅人,又點會令佢成日沾沾自喜呢?
689走,梁粉繼續殘喘喺政壇作惡,也是現實,邊會咁幼稚覺得問題迎刃而解呢?你睇,梁粉典範──蔣麗芸呢個星期嚟晒料咁,就知道「狼惡政遺毒」有排先可以消除啦。
可能元秋太唔開心,鬱鬱寡歡,所以決定發洩落立法會同事身上。星期一嘅教育事務委員會,上演咗呢一幕,去片:
所謂「阿媽教仔,無得停低」,偉大的蔣主席為了捍衛事務委員會主席的尊嚴,不惜顛倒黑白,甚至乎將坐喺一旁食花生的吳局長當係聾嘅,堅持議員問問題局長係聽唔到,要由蔣主席自己開金口去代為發問,撥正為亂,嘆為觀止!蔣主席為局長遮風擋雨,其心可誅….唔係唔係….可嘉!
呢三位議員真係唔好彩,遇著個鬱燥兼權力暴發戶:主子失勢,自己有權就要用到盡,甚至提出難頂至極又唔合乎議事規則嘅要求。蔣主席呢個要求,查議事規則,相對應嘅只係適用於立法會主席或「全體委員會」主席,其實只係個名唔同咗,但都係代表同一個人,就係梁君彥。而其實規則只係列明,議員係要將佢嘅意見向主席陳述。
而過往慣例,議員通常會喺發言開頭先講一聲「主席」或者「多謝主席」,然後發言對象就會轉向官員,發問完畢後,就會由主席講一聲「X局長」,係唔會由主席去將問題撮要甚至扭曲意思。
明明係大家都好明白嘅慣例,我竟然用咗一大段去解釋,我都覺得好神奇。從來唔會有人認為係有問題,更從來冇人要求議員要先向主席本人發言,蔣主席創歷史先河,自行釋法,合唔合理,大家都心知肚明啦,呢啲就係梁粉嘅咀臉。所以我好認同鄭松泰俾佢嘅反應,更加為黃碧雲嗰句「痴線架你都」拍掌叫好。
不過咁,冇得做梁粉,你仲有國家,係咪?鄭松泰調轉建制派水杯裡的國旗,西契謝偉俊話佢行為不檢動議譴責,又提供咗個舞台俾蔣主席大放笑彈。佢抑揚頓挫,比起朗誦比賽嘅少年有過之而無不及,先形容今次係要執行「家規」,跟住就話,「國家嘅旗代表我哋中國人幾千年文化歷史蘊藏於此」,然後反問鄭松泰會否倒插自己祖先嘅神主牌?喂,好精彩,去片啦。
真係字字珠璣呀!炎黃堯舜禹聽到都即刻彈返起身,無啦啦被代表。咦,唔通,國旗嗰五粒星就係代表佢五個人?唔得!最大粒星係共產黨丫嘛,剩返四粒你哋自己睇吓點拆掂佢啦下。
件事真係好無聊,鄭松泰好無聊,支旗又好無聊,呢班借題發揮嘅保皇黨更加係無聊。而蔣主席嘅精彩表演,更加話俾大家聽,佢哋為咗上綱上線,幾嘔心嘅諂媚說話都講得出。
呢一個星期,蔣主席嘅大規模發難,同其他梁粉一片寂靜沉默顯得大相逕庭,但又相映成趣,蔣麗芸嘅鬱悶,其實就係梁粉嘅鬱悶,佢哋呢幾年以嚟俾人睇到嘅精神面貌,就係不停強調自己好努力,主子好努力,為香港,為中國,做咗幾多幾多,但無人明白,一片眾人皆醉佢獨醒嘅樣子。
作為一朝攀上權力高峰嘅人,卻唔識得運用權柄,只識有風駛盡艃,認為嗰樣嘢係啱,其他人就應份去認同,唔容許有半點異議嘅空間。蔣麗芸揸住立法會嘅公權力,就示範咗梁粉嘅處事手法。其他無公權力嘅,上星期重係意氣風發寫文插人,到今日呢?呵,大概明白沉默是金。
本人思畸,向你哋敬禮,好行夾唔送。
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】烏軍攻入俄國庫爾斯克州近兩周,並炸毀兩座重要橋樑,你認為俄烏戰爭會否急劇惡化?► 立即投票