密鑼緊鼓預備做特首嘅林鄭，短短十日內連續兩次締造政績，體現近年少見嘅高效率。林鄭自從想選特首之後，似乎茅塞頓開，了解到緊抱中央嘅融港路線，再加少少夾硬嚟同先斬後奏，就可以遇神殺神，遇佛殺佛，唔怕香港人有幾抗拒，最緊要面對大陸，「你要幾多地？我就俾幾多你。」

　　上星期就係西九本來嘅圓形表演場地，突然成為獻媚工藝品、方形嘅故宮博物館，圓方圓方，未能圓謊，林鄭一干人等噚日都係要推出「事後諮詢」，不過就唔係諮詢你「起唔起個館好呀？」，而係「起就起硬架啦，點起都決定咗架啦，爭在入面擺咩顏色嘅垃圾桶？廁所要幾多個？」呢種態度去諮詢大家，真係皇恩浩盪啦。

　　今次Monday送大禮嘅幸運兒，就係落馬洲河套區。呢一塊地丟空多年，逐漸成為稀有物種嘅棲息地。不過，相信好多香港人都已經遺忘咗佢。因為佢同西九唔同，唔係喺個市中心篤眼篤鼻，而係位處極北，根本就係接壤深圳，所以，攞佢嚟做創科園，定係好似2010年乜都冇做過嘅曾蔭權政府，曾經空想過嘅「大學城」，甚至乎，係割讓埋俾深圳，大家都好似唔會好care，係我呢啲喺梁粉五毛心中怨毒至極嘅人，先會窮追猛打。

　　經過多年嚟兩地嘅發展，香港、深圳喺創科已經各自走上唔同嘅出路，香港各大專院校每年有數以千計嘅科技人才出爐，數理、研發方面係強項，但未出到能夠打響國際名堂、「香港人製造」嘅科技產品，深圳就包攬中下游業務，意思係生產方面嘅能力，而且正喺度磨拳擦掌吸納國際科技企業到深圳設總部。以上呢樣嘢日日都識講，但解釋唔到點解要喺落馬洲河套區興建呢個創科園。

　　因為大家都解決唔到最核心嘅問題───河套區無地利。呢樣嘢足以殺死所有嘅空想。首先，香港見過鬼，數碼港係絕頂嘅失敗之作，從數碼城市，變成貝沙豪宅城，三棟所謂「high-tech」辦公室大廈變咗配菜；科學園其實係有作為，本身佔地比得上深圳南山科技園區，但而家有逾一半面積用嚟起咗低密度豪宅。林鄭今時今日同大家講，河套區項目唔會變成另一個地產項目，喺今日塊地都未平整好嘅時候，林鄭呢句都係當聽住先。

　　第二，呢塊地，對深圳人嚟講吸引力係大好多，喂第時過條橋，過個簡單嘅關口，就入到嚟呢個創科園啦喎。香港嘅人呢，最快方法就係搭九個字火車去到落馬洲，再行15分鐘返工。即使有穿梭巴士來回市區，對大部分人嚟講都係非常舟車勞頓，除非，你選擇搬去福田住，或者搬去都唔知幾時先會起好嘅古洞北發展區。如果我係IT人，我會問，點解唔做好咗科學園先呢？科學園位置更加有利，靠近深圳同香港市區嘅中間點，交通對兩地人都算方便；本身可供發展嘅土地多兩倍；背面係一間大學，可協助培訓科研人才；喺咁嘅情況下，唔用河套區，深圳嘅人就落唔到嚟互相溝通交流，或者喺產業上互相合作？

　　深圳現有南山，同將來嘅坪山高新園區，喺唔愁唔夠地嘅情況下，落馬洲河套區嘅定位變得非常奇怪，佢點樣融合到徐立之所講嘅香港中上游、深圳中下游科技產業？點樣解決位置偏遠問題？會唔會最後成為別人嫁衣裳，只係成為後勤廠房呢？十年後起好，國策又係咪已經會唔同咗？科技又已經進步到唔再需要呢塊地？

　　呢啲問題，喺港深政府嘅構想中，搵唔到答案。反而，我哋睇到嘅係河套區項目，唔係為香港人而建，亦唔係真係為深圳人而建，可能，係為造王而拍板，目的就係要延續以長官意志至上嘅腐敗政治文化，成就689 2.0。連續兩個星期啦，下個星期又會唔會有其他嘢分俾大陸呢？

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】以伊衝突升級，北韓派兵增援俄羅斯，你會否擔心世界發生大規模戰爭？► 立即投票