2016-05-18
反張德江保安級別
同譚惠珠一樣樣嗰位中國領導人,嚟反轉香港三日,沿路經過嘅地方都要封路、停工,蟻民要讓路,天空要明淨,呢個麻煩人入住酒店所處嘅灣仔北變成戒嚴區。警方話係以反恐保安級別行動,啱呀,我舉腳贊成,對付一個間接令我城299人枉死嘅恐怖份子,呢個安排合情合理。(03年張德江任廣東省委書記時,被指隱瞞沙士疫情,下令傳媒封口,最後疫情擴散至香港,導致有1755人染病,299人死亡)
你睇吓,今次張惠珠定唔知呀譚德江嚟香港,係為咗要參與「一帶一路論壇」,聽聞有20個沿線國家嘅領導人或者代表會嚟香港出席會議,同樣都係領導人,但係就唔見警方有如斯大鑼大鼓建立一道道車牆包圍,就知道佢哋冇咁恐怖啦。
睇返五年前,時任中國國務院副總理李克強嚟香城「考察」三日,當時已經被指係擾民,去港大、去麗港城、去老人中心,傳媒同蟻民都被多番阻撓,唔好話可以同李克強表達吓喺劇本以外嘅訴求,連見到佢條頭毛都難,重要喺麗港城搞出黑影事件,港大就出現818事件,有計劃向李克強示威嘅學生喺校內被禁止通行。搞到滿城風雨,「黑影論」、「垃圾論」出自官員嘅口,做衰晒政府個名啦。
嗱,香港警察今次就從善如流啦,即刻改善成個安排,封咗成個灣仔北乾手淨腳,水馬圍城,一個普通市民都見唔到,途經嘅路全封,令香港人終於明白一帶一路點解啦,「中環灣仔一帶我霸晒,封剩一路理得你喊定嗌」。
(圖片來源:占占政漫)
行程安排又係好epic,去嘅地點索性揀啲冇乜人嘅,科學園呀、上水安老院呀,(但係都照樣附近啲路封晒),最精彩嘅行程,一定係去安達臣發展區,睇一個未入伙嘅公屋邨,而且有傳媒報道,政府唔排除喺佢參觀緊呢條空無一人嘅邨時,隔好幾條路嘅將軍澳隧道會暫時停駛。話唔定張德江宣佈嘅最惠港政策,就係買起呢條新嘅屋邨,遠道而嚟唔係去做家訪,而係去睇一條新嘅邨喎,仲唔係去睇樓做大豪客揀樓買刺激樓市?
從行程上嘅安排,都睇得出港府視張德江為國家級嘅恐怖領導分子,一嚟知道今次呢個係比李克強更加恐佈嘅張德江,二嚟就係視之為生人勿近,而且面子極薄,遇到唔順心嘅就會怪罪佢哋,如果唔係點解會咁敏感?
先有政總外行人路地磚落膠水(但過兩日就俾雨水一沖即溶),之後上獅子山紥營防止啲人上去掛直幡(但尋日就有人上咗另一座山掛直幡),然後重要喺正常採訪記者嘅安檢時,勒令唔准帶黃色毛巾入場。政府人員咁緊張,肯定係張德江見到黃色嘢會敏感到暴斃啦,我有理由相信喺張德江嘅視線範入面,中國國旗嗰五粒黃色星星係抹走咗嘅,就係一片紅色!
呢一種紅色做法,已經完全同大陸接軌,總之凡親有大人物到,所有唔關事嘅人同物都要退避三舍,最重要係,顯示呢個政權係幾咁脆弱,仲記得早幾年曾經喺中共兩會時,去到北京採訪,喺天安門一帶,隔幾分鐘路程就要一次安檢,十步一警衞亦係平常事,當偉大嘅「領導人」進出會場時,天安門周邊嘅馬路就要封路,唔使通知你,話封就封,塞車都冇辦法。
以前香港呢?有規有矩,係幾時封,封咩範圍,交代得清楚,冇乜人會挑戰你嘅決定,最多怨兩句可能要兜路,但就算封,亦講唔上封咗主要幹道,總之確保方圓一公里冇「危險車輛」埋身。今次呢?一粒微塵都係危險品咁滯。
呢個政權真係有心面向人民?呢班官員真係明白咩叫「為人民服務」?定係到最後,有錢賺就咩都唔理?咁到最後就只會好似張德江個老頂,習近平訪英時候,又要擔心風水,又要人油紅個衣櫃,窮得只剩錢。
或許,英女皇呢刻慨嘆講出一句,"Oh, Hong Kong, bad luck."
Yes, Your Majesty, the bad luck has been strangling us for nineteen years. It may never end.
英女皇1975年首次訪港時到訪愛民邨(圖片來源:昔日香港)
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】烏軍攻入俄國庫爾斯克州近兩周,並炸毀兩座重要橋樑,你認為俄烏戰爭會否急劇惡化?► 立即投票