六四事件，係一件好簡單嘅事，就係一個專制政權，不惜一切去壓制一場非常「和理非」嘅民主運動，「要槍有槍，要炮有炮」，政權雙手沾滿鮮血清場，自此中國民主路截斷，「發展就昰硬道理」，多年堆砌出虛妄的繁華，但人民連最基本的人權都可能隨時被剝奪。六四係中共喺文革後犯下最嚴重嘅罪行之一，帶嚟嘅壞影響，到今時今日仍然係有過之而無不及。

 

 

　　香港人多年來一直堅持悼念，27年了，大家都沒有忘記。但應如何處理六四記憶？兩代人、兩派人之間的嫌隙，「谷」住咗幾年，今年終於來到一個大爆發，曾經在維園點起燭光、為六四英靈流淚的人們，喺呢一刻，相信卻正為呢件簡單嘅事件，有住複雜、難以言喻嘅情感（梁振英除外）。

 

　　自舊年退聯潮以來，學聯分崩離析，剩下四間大學作會員，佢哋作為支聯會創會組織之一，今年四月正式宣布退出，原因係學聯近年已沒有派員出席支聯會會議，常委會主席陳瑞玲指與本土思潮多多少少有關。學聯亦唔會派代表出席六四晚會，但的確唔代表大學生遺忘六四事件。到最近，十一間大專院校宣布，會喺六四當晚，組織一個聯校六四論壇，當中會討論香港前途問題。香港大學去年開始另辦六四晚會，今年佢哋就另辦論壇，探討六四對香港前途嘅意義，臨尾有默哀儀式，擺明同維園六四晚會撞期。

 

　　但最矚目嘅，係各大專學生會代表嘅言論激起千重浪，港大學生會主席孫曉嵐上電台節目時表示，現時大學生唔同意支聯會「建設民主中國」綱領，亦都相信未來一兩年，悼念六四會喺學界議程中剔走，質疑「悼念六四係咪應該有一個句號？」

 

　　過去我並非每一年都會出席六四晚會，原因係向六四英靈悼念嘅燭光，的而且確唔係維園先獨有，我亦唔認同一定要有維園滿地燭光嘅一張相，咁樣會令到晚會意義變得形式化，出席嘅話，係隨心，大會嗌嘅每一句口號我唔會跟足嚟嗌，印象中只會跟嗌「平反六四」、「結束一黨專政」、「追究屠城責任」呢三句，其他都有所保留，「建設民主中國」係當中嘅代表。以前我係認為呢個唔係喺晚會嗌兩句，個對象—中國共產黨就會聽到。而家更加堅定，係因為我認同學生嘅一句，「建設民主中國並非香港人的道義責任」。多年來香港同中國本身已經行緊兩條截然不同嘅路，將之綑綁，可能係作繭自縛。

 

 

　　當今日嘅年青人決定以香港人身份看待問題，而支聯會嘅名稱同心底入面仍然抱住「愛國」二字，就好難再話大家係行緊同一條路，綁埋一齊，是旦一邊都唔滿意，咁點解唔肯放開？

 

　　同樣「本土化」嘅樹仁大學學生會編委會總編輯吳桂龍喺facebook寫文，我就認為係本土派「豬隊友」，佢跟隨國師口吻，讉責支聯會「情花邪壇」，指責支聯會係「鴇婆龜公」，係被強暴之後變身成娼妓中介人，將香港人綁架做妓女送俾中共享用。

 

　　我先假設兩派人各自都有動力去達成自己目標（分別為建設民主中國及本土自決以至港獨），我係真心想問點解唔可以各有各做？點解一定要將啲說話講到最盡？甚至乎根本係離題嘅攻擊，目的純粹係為咗寫完出嚟「好爽」。呢種不學無術之徒寫出嘅比喻，不值一提，亦對討論毫無助益。

 

　　講到尾，後生一輩，尤其是傾向本土嘅人，正係越嚟越心急，除咗係身份認同感已經係兩回事之外，仲有就係六四係失敗咗嘅運動，點樣悼念係一件事，點樣汲取教訓，再去決定各自條路點行，先至係正確方向。晚會、論壇各有各做，唔好再拗啦好嗎？

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情