新正頭，娛樂新聞數量少過來港活雞，編輯、記者搵料填版面頭都大晒，好彩有周潤發，義無反顧，為主演的賀歲片，不辭勞苦宣傳，一夫當關，日日進佔各娛樂頭條，如果香港電影金像獎有「最抵錫演員獎」，發仔（習慣這樣稱呼他，叫發哥反而見外）實至名歸兼眾望所歸。

　　薑是老的辣，發仔的宣傳手法，層出不窮，單天保至尊的野生捕獲周潤發成為氣候，成為新春吉祥物，十足見報保證，selfie谷高人氣，犀利過奧巴馬白宮扮selfie推銷醫保方案，另加接受多個專訪，場景個個不同，專業地換上不同服飾、打扮，話題百花齊放，不局限宣傳《賭城風雲II》，篇篇新鮮樹上熟，百看不厭，發嫂又會扮靚靚客串登場，跟平時在九龍城街市遇到的她，完全是阿四同貴婦之別。

　　周潤發近年由荷里活回流大中華影圈，主演的電影，未有爆票房和問鼎獎項之作，雖說他已有大手掃入物業的身家，得過獎項之多，應不志在，可以拍戲當遊戲，hea做，但作為一個有尊嚴的藝人，除非隱退，否則一日處身名利場，眾目睽睽下，不容有失，尤其今仗，對手是後起（對周潤發來說）張家輝，七料影帝，高手過招，稍不留神，變成長江前浪，片酬夠買九龍塘大屋都補唔番自尊心、虛榮心的創傷。

　　不論為公，或為私，發仔的落力，值得尊敬，片商、記者慶幸，有發哥，冇奔波！

轉載自: 晴報

想要獨家投資理財Tips？即Like etnet 全新Facebook專頁► 立即讚好