譚校長魅力驚人，首首金曲，歌迷耳熟能詳。演唱會上，全場歌迷經常跟他大合唱，氣氛由頭高漲到尾，無半秒冷場，幾乎無廁所位。做騷多過食飯的阿倫，唱足三粒鐘，氣定神閒，以他的年紀，年輕一輩應滴晒汗。

　　前晚劉德華任嘉賓，譚校有嗰句講嗰句：「當年叫佢唔好唱歌，要唱就要勤力過我，點知佢真係勤力過我，劉德華！」

　　兩位天王老友鬼鬼，口沒遮攔，阿倫嘲著鞋唔著襪的華仔，因買奶粉沒錢買襪。從來怕提私事的華仔，沒抗拒，並報以哈哈大笑，他反擊阿倫：「你收身收得唔錯，淨係收到對腳咁瘦。」阿倫答因少用對腳，反嘲劉華對腳也很瘦，劉華自嘲同樣少用對腳，所以遲至現在才生女，兩人即興爆有味對話，逗得全場觀眾大樂喝釆。當晚花紅，還有觀眾席上的苗僑偉、戚美珍，大受歡迎。

　　演唱會開三面台，音響、燈光、製作，極盡完美，廿多人大樂隊，王者氣派，譚校銀河歲月40年，他要送自己一份厚禮，一個簽名式的演唱會，他不惜自掏腰包，製作皇冠燈棒，送給每位入場觀眾。大家亮起燈棒，紅磡滿布繁星，聽憑譚校在台上指揮方向搖動，太美了。有人抵死問：燈棒要還嗎？當然不用，阿倫豪給粉絲的，此外，還豪出一疊演唱會紀念利市封，方便新年入座歌迷封利市給幸運倫。

轉載自: 晴報

樂本健【秋日開倉26 - 27/9】保健品低至$20！► 火速行動