羊年娛樂性至高的賀歲短片，「麒麟撞飛葉劉」認第二，誰敢認第一？

　　年初二花生剝到初七人日，仍意猶未盡，由葉劉是否企錯位、做攝石人、是喜兆還是凶象、麒麟師傅會否被算帳，吹水、抽水、揶揄、嘲弄、七嘴八舌樣樣齊，同情、關心傷勢聲音疏落稀少，不用鍾庭耀做民調，民意已發聲。

　　如果葉劉行快一步行慢一步，如果麒麟師傅先擺左再向右，如果如果……如果撞唔正，葉劉又怎會成為新年焦點人物？人氣撞到飛升？從這角度看，她是贏家，分庭抗禮，另一贏家是麒麟啤，成為代表性飲品，大小派對宴會，大家都「隊」番杯，「隊麒麟啤」，港式地道新潮語，毋須多講，笑聲四起，葉劉成為免費反面代言人。

　　麒麟撞葉劉完全可以避免，需要的是一個導演，就當年初二拜車公，是電視台一個大騷，監製、導演預備節目流程，到現場睇位，用膠紙在地上貼個交叉嘜位，導演向主禮人、嘉賓、鄉紳、麒麟、鑼鼓有關人等做briefing，安排妥當，臨時加插嘉賓，地上貼多個交叉，吉時到，導演手執對講機吩咐場務，起鑼鼓，咚撑！咚撑！麒麟起舞，先行入廟，主禮和嘉賓跟隨，不會出現人獸爭路，儀式順利完成。大吉大吉。

轉載自: 晴報

【etnet 30周年】多重慶祝活動一浪接一浪，好禮連環賞！ ► 即睇詳情