一星期返工返五日，就對足同事五日！如果坐你隔離嗰個係位好同事，咁做起嘢上嚟唔單只得心應手，仲可以返工返得好開心添！等小編即刻同你睇下好同事嘅五大特質啦！

1. 有親和力

　　返工日日做足八、九個鐘，有時做做下嘢無聊想吹水，身邊有一個願意聽你講，兼且肯同你互動嘅同事真係好重要！

2. 唔喺背後議論同事

　　辦公室入面總有人鍾意「是非當人情」，將由當事人身上得知、或者唔知由邊度聽返嚟嘅小道消息，再加鹽加醋講出去！雖然話，返工講下八卦嘢係幾「過日晨」，不過有時都真係會傷害到人（尤其傳到返當事人耳中）。如果你身邊有一個唔會喺人背後講是講非嘅同事，小編真係要恭喜你了！

3. 遇到困難會主動請求協助

　　工作上遇到問題其實一啲都無問題，最怕就係唔識扮識，搞到一鑊粥嘅時候先肯搵人幫手！所以話，下次同事有問題搵你幫手嘅時候，千祈咪當人係「人頭豬腦」，反而要欣賞佢嘅不恥下問！

4. 唔會只顧自己事

　　有人肯問「功課」，當然亦要有人肯教「功課」！一個願意放低自己手頭上工作嚟幫你嘅同事，點都一定係位好同事！

5. 敢於批評

　　批評嘅說話唔係人人都敢講，講得出嘅應該都只有兩種人，一種係咩都鍾意踩一餐嘅人，而另一種就係真心想你進步嘅人！所謂忠言逆耳，如果有一個同事唔怕「得罪」你，都要「教精」你嘅話，請你一定要好好珍惜佢！因為喺職場，由得你錯嘅人大有人在。