18/01/2023
演員轉戰樂壇勇於應對負評 蘇麗珊感恩男友成心靈依靠
【晴報專訊】演員出身的蘇麗珊,去年轉戰樂壇做歌手,讓大家認識她的不同面向,尤其她親自創作的新歌《愛情只是藝術品》,表達她內心暗黑的一面。身兼演員、歌手及老闆娘,她坦言每個崗位都需要有強大的心臟,才能適應改變及應對批評;幸好,有圈外男友陪她一起面對,令她更有信心邁向夢想。
由演員轉型做歌手,蘇麗珊自言兩者工作方式大有不同,「演員比較被動,但歌手可以好個人,例如我嘅新歌《愛情只是藝術品》係自己作曲,由demo開始,個腦已經思考要咩歌詞、編曲點玩、MV點拍,比較多自己嘅元素喺裏面。」她坦言做歌手比想像中困難得多,很多事要重新學習,幸好現在仍處於「蜜月期」,「由零到出歌嘅過程令我有好大滿足感,呢種滿足感唔知會唔會到我出第十首歌之後就無咗。(做生意輕鬆啲?)做生意唔係想像中咁易,每份工都好難做,既然係咁,點解唔揀一份自己開心嘅工去做呢?我未餓死,總會搵到生存方法,而我一直好想嘗試唱歌。」
男友一直支持蘇麗珊的演藝夢想。(IG圖片)
蘇麗珊感激粉絲一直支持她,至於外間的反應,她說︰「我唔係好理出面啲人鍾唔鍾意,我控制唔到,每日睇住啲評論,都唔會幫到件事嘛!最重要係做好音樂,希望搵到屬於自己嘅音樂風格。(做樂壇新人想知外間睇法?)可能我做過幾年演員,覺得外間睇法好主觀,你做緊嘅嘢無話啱唔啱,只係在乎有無觸動到人哋心靈。」她坦言,一定要有強大心臟才能面對一切,例如出歌無爆紅,不等於放棄唱歌;疫情時演員幾近無工開,也不代表放棄演戲,「我好鍾意聽Beyond,佢哋嘅歌好有力量,無論係開心時加油,或者唔開心時,都畀到我力量,我希望自己嘅音樂都感染到人。」
理性分析負評
新歌《愛情只是藝術品》表達蘇麗珊暗黑的一面,她坦言私底下有很多面向,但觀眾只會看到她開心的一面;當不開心時,她會選擇作曲解憂。她大讚圈外男友是她心靈上的依靠,「佢唔止係我男朋友,亦係我好朋友,佢係最親密的人,有咩唔開心都同佢講。」她感激男友全力支持她唱歌,而且大家都喜歡挑戰新事物,互相鼓勵非常重要。提到在ViuTV劇集《繩角》的演出被批,她說︰「收到負面評論當然會唔開心,但同時有好多人私訊同我仔細傾劇情。好同唔好嘅留言都有,人哋肯話你,其實都係想你進步。(男友安慰?)佢好冷血呀,不過會理性分析,到底係咪做得咁差先?我又覺得唔係咁差啫,男友喺我拍攝期間陪住我,可能某啲演繹方式係合適角色設定,我有努力過,就已經足夠。」
向來甜美的蘇麗珊,在新歌《愛情只是藝術品》展現暗黑一面。(IG圖片)
蘇麗珊在《繩角》演冷血富二代,演技備受批評。
轉載自: 晴報
《說說心理話》【奧運劍擊熱】大師兄張小倫親身分享!贏在起跑線=壓力?如何培育子女有卓越成就?► 即睇