【晴報專訊】現年84歲的謝賢（四哥）早前「出山」拍攝新片《殺出個黃昏》，四哥指拍攝過程相當好玩，但就因為一個原因，拒絕跟兒子謝霆鋒父子檔上陣；至於《殺》片監製林家棟，軟硬兼施才請得郁四哥再登大銀幕，他大爆四哥拍講粗口鏡頭勁流利一take過，卻被一句三級俗語考起，結果家棟花盡唇舌給四哥解釋，最後才順利拍攝。

　　謝賢與林家棟日前結伴受訪，家棟談到如何邀請四哥出山即滔滔不絕，「口水固然要花，我話有好多觀眾同四哥一齊成長，而唔認識佢嘅觀眾都好想認識佢，咁係咪要除低副眼鏡見下人先？我哋梗係講啲好聽嘅說話，四哥心花怒放，咁咪成功囉！不過，我都要招呼四哥啲朋友，佢哋同我講『唔好打爛四哥個招牌喎』，我話唔會。四哥啲朋友好錫佢，唔想四哥咁多年嘅『壇數』臨尾『搞彎晒』；當然，開工時蛋撻、雪茄梗係唔少得，四哥咁就入局喇，我先係千王之王，哈哈！」四哥在旁笑謂︰「畀佢氹咗呀！」

家棟（右）風趣幽默，在訪問中多次氹得四哥笑逐顏開。

開心重遇馮寶寶

四哥和馮寶寶相隔60年後再次合作，在電影中擦出不少火花。

　　最令四哥開心的，就是有緣跟馮寶寶相隔60年後再次合作，兩人再見時惺惺相惜，四哥忍不住話當年。「同寶寶好耐無合作，當年佢好似得四歲，真係手抱住佢；到佢十幾歲時，去咗英國讀書返嚟就同我拍戲，轉眼間就60年。咁耐以嚟我都好錫佢，當佢係我個女咁。」四哥又說：「總之我同邊個拍戲都好好，個個老拍檔都想再合作，個個都係朋友嘛！」不過馮寶寶早已移居馬來西亞，她拍畢電影後亦已返回當地，故兩人未有交換聯絡方式，認真可惜。

四哥經常邀請家棟和工作人員到家中享受鮑魚等美食。

　　四哥直言，早已忘了自己有多少年無拍戲，自封「消遙浪子」的他笑言，「有得玩就玩，最緊要每日開心，佢哋搵我拍戲，我咪當玩。」家棟亦大讚四哥這位演員很聽話，「準時係必然，佢唔收OT錢呢下好，完全唔計較，有時拍遲咗，佢都無講過一句，但有時同佢講收工，佢會話『下，走喇？無嘢撈喇？』佢好享受喺片場同朋友、工作人員拍嘢。」兒子謝霆鋒近年在影圈的成績有目共睹，但四哥甚少看兒子的演出，亦婉拒父子檔合作。「我唔睇佢啲戲！我都無戲做，你做晒啲戲，留啲畀老竇做。我唔同佢拍，佢威過我咪大劑，依家唔知佢威唔威過我㗎嘛！真係無諗過（合作），佢真係好忙，依家仲喺大陸，呢兩年都唔返嚟，我兩年無見過佢，電話聯絡都好少，除咗我生日會打嚟講兩句，如果有人搵我哋拍戲先再講啦！」

講粗口拍感情戲

　　家棟表示四哥在《殺》片中有句粗口對白，「四哥擔心效果如何，我話導演識處理。呢句對白係三個字嘅粗口，我話拍咗先，唔得就剪咗佢，其實嗰場係感情戲，要四哥講粗口都幾爆，但出到嚟又出奇地好睇，仲要一take過。」家棟忍不住繼續爆料，「四哥有句對白係新派嘅三級俗語，佢NG咗好多次，因為演員唔明白個含義就好難演繹。但我好少出嚟蒲，起初都唔知句俗語點解㗎！」四哥則陰陰嘴笑說，「依家我知呢句嘢點解啦，即係『趙完鬆』嘛，呢句說話係我十幾歲時啲老人家講嘅。」