【晴報專訊】後日是父親節，圈中三位星級型爸──快將成為兩孩之父的鄭嘉穎、新手爸爸羅仲謙，以及有三名成年子女的王敏德，對這個特別節日都各有感悟，當中流露他們鮮為人知的真性情，和對子女未來的期望。

鄭嘉穎一手抱着囝囝Rafael，一手攬着已懷第二胎的太太，幸福之情不言而喻。（IG圖片）

　　50歲的鄭嘉穎去年二月榮升爸爸後，今年再有好消息，太太陳凱琳已懷了第二胎，雖然暫時未知BB性別，但一家人都非常開心迎接這個小生命。成功三年抱兩，嘉穎笑言不是預期中事，絕對是驚喜。快將成為兩孩之父，今年父親節會否特別有意義？嘉穎說：「父親節冇乜特別慶祝，應該係簡簡單單同外父一家食餐飯慶祝。」他直言以前幻想過做爸爸是怎樣一回事，但原來真的當上了爸爸後，感覺卻有所不同，他說：「真實原來係開心好多。」

鄭嘉穎和Rafael輪廓相似

　　現時大仔鄭承悅（Rafael）一歲多，開始懂得走路，又會講「外星」BB語，非常可愛。太太懷有第二胎，嘉穎負責照顧Rafael，沒有假手於人，所以傳媒或粉絲經常拍到他帶Rafael到公園「放風」的相片，從中看到嘉穎細心的一面，他會為囝囝悉心地抹手抹面，防範新冠肺炎疫情，是無微不至的好爸爸。嘉穎表示：「照顧孩子每個階段有不同難度，依家佢識行就怕佢跌倒受傷。之前佢喺BB時期，會擔心好多嘢，佢發燒，我就完全瞓唔到覺，每一、兩個鐘會醒一醒去睇下佢。」

　　至於對Rafael的期望，嘉穎說：「唔奢望佢日後一定好成功或者出人頭地，只希望佢做個好人、健健康康，就心滿意足了。」

羅仲謙︰女兒是工作最大動力

羅仲謙直言，女兒小珍珠和太太楊怡也是他的精神支柱。（IG圖片）

　　羅仲謙今年以爸爸身份度過第一個父親節，女兒小珍珠出世兩個月，謙仔直言做了爸爸後的感受比以前更深，他笑言︰「以前真係無父親節觀念，覺得呢個節日關我咩事，依家自己做咗爸爸，就開始有感覺了。」

　　問到謙仔這個新手爸爸有甚麼難忘事？他露出一副甜笑樣子︰「最主要係心態上唔同咗，依家任何時候提起個女都會好開心，同時佢有少少嘢我都會好緊張，例如佢咳一聲，我即刻好大反應『佢做咩事會咳？』」問謙仔和老婆楊怡哪個較緊張女兒？他笑言︰「阿怡緊張嘅嘢比較宏觀，例如BB飲食方面，我緊張嘅係雞毛蒜皮嘅事，好似個女生咗粒瘡都會好緊張，總之小小嘢都驚一餐，不過佢始終都係我嘅動力，以前賺錢為咗老婆，依家會諗埋個女，希望佢大個之後生活會好啲。」

兒子留美8個月返港 王敏德︰趕及父親節一家團聚

Michael和太太Janet抱住三個仔女，完全是幸福家庭的寫照。子女長大後，都很疼錫父母。（IG圖片）

　　每年的父親節，王敏德（Michael）的三個仔女都會安排特別的慶祝節目，但今年礙於新冠肺炎疫情，Micheal的20歲細仔王躍穎（Kadin）差點無緣參與。Ｍichael表示，兒子已經八個月不在身邊，他說︰「上年個仔去咗美國，之後因為疫情關係，一直未能返港，好彩佢上個月底已從美國洛杉磯返港，啱啱好趕得切一家人喺父親節食飯。」他表示，現時Kadin在淺水灣一間寓所進行14天家居檢疫，這位廿四孝老竇為了多見兒子幾面，在Kadin隔離14日期間都速遞美味食物給他品嘗。

　　問Michael難得一家人重聚，會怎樣慶祝父親節？他興奮表示︰「每年三個仔女同埋老婆（馬詩慧）都會有suprise畀我，估計今年應該繼續有surprise，哈哈！幾個仔女都好乖，會準備一個好特別嘅蛋糕，又會寫卡畀我，我覺得呢啲心思比起一份名貴嘅禮物更加開心。（收過甚麼最難忘的禮物？）幾年前大女寫咗張卡畀我，我睇完後感動到喊咗出嚟，佢喺張卡寫咗感謝父母多年來嘅辛勞，細個時照顧佢哋返學，佢寫咗好多以前嘅嘢，令我好感動。（今年期待收到甚麼禮物？）其實一家人一齊食飯已經好開心，我哋每次gathering都會影相，甚至拍video留念，有時我會rap song，又同幾個仔女一齊跳舞，好開心。」