【晴報專訊】陳山聰首次以「男一」身份孭飛演出劇集《金宵大廈》，劇集播出一星期以來，贏盡口碑，連已經離巢TVB的李施嬅，亦特意返港出席宣傳活動，二人更期待開拍續集。

陳山聰和李施嬅對劇集獲觀眾追看，感到非常鼓舞。

　　一眾演員昨日以《金宵大廈》中的造型亮相，陳山聰與李施嬅表示沒想過劇集回響大。山聰飾演大廈保安員，他笑言每晚返家，大廈管理員都直呼他在劇中的名字「阿蕭」，山聰更自嘲可考慮返TVB替門口保安頂更！對於首次擔正能有如此佳績，山聰表示︰「感恩，起碼無陀衰家！」

　　李施嬅憶起拍攝時一些恐怖情節，笑言不敢再想起，「我叫趙希洛唔好搵我，佢個角色令我好驚，哈哈！」對於《金宵大廈》被封為神劇，山聰充滿驚喜，施嬅即笑他︰「你個『一綫』坐穩啦！上埋神枱。」山聰揚言一定會請食飯慶功，如果有機會原班人馬拍續集也是好事。至於施嬅已離開無綫，但她說如果監製想她添食，一定會答應。

黃子雄在劇中迷戀「Mary公仔」。

　　同劇的黃子雄被問到好友劉美君被飛出《全民造星2》，改由陳潔靈頂上做導師，黃子雄表示劉美君最近返了美國湊孫，「發覺佢有得返美國都幾開心，（更換導師）唔會有太大影響。」

黃祥興考慮做結紮

黃祥興將第三度做爸爸。

　　此外，黃祥興育有一仔一女，近日宣布太太懷第三胎，目前已有五個月身孕，兩公婆認為生仔定生女都無所謂。黃祥興坦言今胎是意外懷孕，太太生完就會「封肚」，他又稱︰「我都要諗辦法做少少嘢。（結紮手術？）係啦，都41歲，三個小朋友，已很美滿。」