【晴報專訊】廖啟智（智叔）與陳秀雯相隔近三年再度合作，在ViuTV新劇《教束》分別飾演校長和副校長。昨日兩人在新劇記者會上與一班年輕演員分享拍攝點滴，入行接近40年的陳秀雯，直言與年輕人合作，感到十分熱血。

陳秀雯及廖啟智在新劇中鬥餐飽。

　　廖啟智、陳秀雯、劉俊謙及黃澤鋒等昨日現身記者會，對於今次與老拍檔陳秀雯再合作，智叔表示︰「睇下啲觀眾會唔會覺得有默契啦，唔知人哋受唔受。」陳秀雯聞言即充滿信心說︰「我哋自己演時有默契就有㗎啦！」提到劇集講述校政風雲，廖啟智直言故事是現今社會縮影，劇中一幕被學生包圍的戲份，他直言拍攝時真的感到害怕︰「嗰刻感受真係驚驚哋，原來一個小朋友會扮到大人嘅行為，令我心驚，有意見唔緊要，唔好圍我嘛！」

不做怪獸家長

新劇有不少年輕演員參演，獲陳秀雯大讚夠熱血。

　　問兩人如何評論時下教育？智叔說︰「好好喇，政府又撥多50億畀學校，如果我真係做校長，學校多幾億真係唔錯。」而陳秀雯則不太認同「怪獸家長」的行為︰「我認識嘅家長真係騰雞得好緊要，壓力大得好緊要，佢哋要陪啲小朋友學好多嘢，點解要咁，唔係好明。」

　　智叔聞言附和說︰「最慘係要比較，驚會比人低，我就唔驚喇，因為我根本就係低。」陳秀雯慶幸兒子已長大成人，所以不用做「怪獸家長」，又慨嘆現今小朋友要十項全能很可憐，智叔即說︰「同低過你嗰啲人比嘛！」但陳秀雯不認同︰「小朋友讀書叻，但總有一樣嘢係唔夠讀書差嘅人叻，每個人都有佢資優嘅地方，唔一定係學術上。」

　　另外，多年沒拍劇的陳秀雯去年接拍《教束》，她透露自己畢業第一份工就是做演員，所以何時拍劇都一樣，演戲心態不變，但她說︰「唯一係今次同年輕班底合作，要重新適應合作方式。（同年輕人合作好熱血？）不嬲都熱血，智叔就知，我係會掹住佢哋唔放嘅人，我眼中佢哋只係學生，啱啱出來拍戲，如果無熱情，呢條路會好難行。」