10/08/2016
樂迷笑住Like 王菀之軒仔新廣告耍騎呢舞功
【晴報專訊】張敬軒(軒仔)近日聯同王菀之(Ivana)合體拍攝AIA保險公司的健康App廣告,這對「排骨精五花腩」組合Fing手Fing腳鬥健康,軒仔更難得化身諧星兼Chok王上身,輕鬆勁吸正評。不少粉絲盛讚廣告搞笑無限Loop;有人卻批評二人太嘈勁吵耳!
早年同屬環球唱片歌手的軒仔與Ivana,初入行曾以「情侶檔」姿態示人,二人先後離巢,其後較少正式合作。近日,兩位唱作歌手宣布合體開演唱會,組成一瘦一肥的「排骨精五花腩」組合。二人首個合體作品前日正式在網上出爐,全長約1.5分鐘的健康App廣告,主題是鬥健康爭獎賞。
合體即吸百萬點擊
一向斯斯文文的軒仔,顛覆入行十多年的書生形象,Chok樣扮型之餘,更與Ivana大跳70、80年代最潮的油脂經典舞步,動作生鬼,盡顯搞笑一面,成功突破「盲腸」。
兩人在保險廣告中忘我地跳出自創舞步,更變聲演出。
另一方面,Ivana秉承她在《老表,你好hea!》及電影《金雞sss》的傻大姐風格,以高八度聲線及騎呢舞功搶鏡。這對舊拍檔默契依舊,鬥浮誇更成功擦出火花,廣告尾段更有好大隻蛤乸隨街跳,硬銷下載該健康App有幾著數。截至昨晚九時,網上總計已狂掃過百萬點擊率,粉絲對軒仔及王菀之這對活寶貝非常受落,高呼廣告充滿喜感;不過,亦有人嫌Ivana的硬滑稽太過火。
轉載自: 晴報
【你點睇】烏軍攻入俄國庫爾斯克州近兩周,並炸毀兩座重要橋樑,你認為俄烏戰爭會否急劇惡化?► 立即投票