既然看能源標籤都未必分辨到電器慳電與否，到底我們還有甚麼方法可以節省能源？以往消委會都測試過不少家電的表現，編者就跟大家一齊重溫一下揀雪櫃有咩慳電貼士啦！

雪櫃慳電貼士（一）︰能源標籤睇得深入啲！

（圖片來源︰消委會網站）

　　目前市面上出售的雪櫃型號均獲1級能源效益標籤，消委會就建議大家進一步查看能源標籤上的每年耗電量資料，仔細比較各型號的耗電量。

雪櫃慳電貼士（二）︰揀變頻壓縮機

　　消委會指出，雪櫃内的部件亦與耗電量有莫大關係，而採用變頻式壓縮機的雪櫃，就比傳統型號慳電。變頻式壓縮機内的摩打設計，就有助改變其轉速及減低耗損，並能更有效運作，以較少的能量控制溫度。

雪櫃慳電貼士（三）︰留意冷凍和隔熱效能！

　　冷凍效率高代表冷凍速度快但耗電少，而隔熱能力強則可以避免雪櫃需要使用更多的能源製冷，比較節能。

雪櫃慳電貼士（四）︰留意照明系統！

　　原來雪櫃内的燈也是影響耗電量的重要一環！採用LED照明系統的雪櫃，耗電量及效率都較傳統鎢絲燈膽為佳，產生較少熱能，壽命都會長啲！

雪櫃慳電貼士（五）︰雪櫃都有假期Mode？

　　原來有些型號設有省電（eco）或假期模式（vacation mode），假如你將長時間不會打開雪櫃門，這些模式就會把雪櫃冷藏室的溫度設定自動提高，以減低雪櫃耗電量。

雪櫃慳電貼士（六）︰使用雪櫃都有學問！

　　選用一部耗電量低的雪櫃，也要配合良好的使用習慣！大家可以將雪櫃擺放在陰涼、通風的地方，確保雪櫃有效散熱，以減慢電量消耗。另外，雪櫃頂要清空以免影響散熱效能，亦可以按照雪櫃內存放食物的種類及分量，調校恆溫器。將熱燙的食物或湯水「攤凍」後才放入雪櫃，都可以慳電！在冬天，大家亦可稍提高雪櫃溫度設定。