《經濟不停學》經濟學101：美債同經濟股市有乜關係？

　　《經濟不停學》成日都會同大家深入淺出咁講下宏觀經濟，或者金融系統等可能一知半解嘅Topic，等大家可以對股市操作有更多背景知識。相信大家成日都聽到新聞報「10年美國國債孳息率報.....」，究竟美國國債有乜咁重要，而美國國債又點影響到股市同經濟呢？

 

 （Shutterstock圖片）

 

美國脫離金本位，美國國債接力成抵押資產

 

  （Shutterstock圖片）

 

　　係到要同大家上下經濟堂先，唔知大家對於國家貨幣點樣發行有無概念呢？美元被稱為「美金」，係因為1944年起美國同英國等40幾個盟國成立「布雷頓森林體系」，將美元直接與黃金掛鈎，而各國貨幣與美元掛鈎，並規定35美元可兌換1盎司黃金的官方定價，呢種制度對穩定當時社會及國際起咗重大作用，美元都可以流行起來。

 

　　但由於1950年起，美國多次發動戰爭，並增發美元應對軍費增加，加上貨物貿易由順差轉逆差，令美元爆發信任危機；直到1971年，美國基礎貨幣供應已經達700億，但黃金儲備只有102億，政府完全喪失美元兌換黃金嘅能力，時任尼克遜總統唯有宣布美元脫離「金本位」系統貨幣政策，亦為往後「73股災」埋下伏線。

 

　　直到1980年開始，時任聯儲局主席沃克爾領導下，將聯邦政府所發行嘅國債作為擔保，以取代黃金位置。簡單來講，美國聯儲有幾多國債，就可以發行幾多基礎貨幣；另一方面，美國同沙地阿拉伯簽署協議，往後石油結算及定價都要使用美元為標準，所以令到美元成為國際結算貨幣。因此，美國國債息率間接影響美元及美股表現啦！

 

債券概念要清晰

 

　　其實債券背後理念都係想籌集資金，但好多人唔理解債價同債息關係。所以呢度同大家簡單講下啦！

 

例子1：

　　一張債券面值係1000蚊，一年期，每一年支付利率一次，假設孳息率（Coupon rate）為10%，即一年後連本金可以拎到1100蚊，而到期殖利率（Yield to Maturity/YTM）同樣都係10%。但假如有人唔想持有呢張債券，想以950蚊賣出市場，假設面值及孳息率不變，咁到期殖利率就會變成：1100/950 -1x 100%＝15.7895％。

　　所以，債券價格下跌，同時債券YTM都會上升，反之亦然，大家概念要清晰啦！以上述例子而言，當債券價格由1000蚊跌到950蚊，債券YTM就會由10%升到15.7895%。

 

債息升點解拖累股市

 

  （Shutterstock圖片）

 

　　投資者普遍認為，10年期美國國債係全球最低風險嘅投資工具，所以成為避險工具之一，每當股市出現大跌或預測未來大跌，資金都會流向美國國債，將其價格搶高，造成債息下跌；不過好似近期，經濟復甦預期樂觀，加上通漲預期令10年期債息率觸及1年高位，去往往觸發美國調整，何解呢？皆因債息上升增加股市估值壓力，而且伴隨聯儲提早「收水」疑雲；加上港美息差拉闊，令資金流出香港，難怪港股呢排都無運行。

 

　　另外，國債作為一種投資工具，都會同其他經濟數據比較，最經常用到就係同通脹比較啦，因為通脹係債券最大敵人！主要由於通脹會侵蝕債券未來現金流購買力，所以當物價上升幅度大於債券收益率，咁市場就會拋棄債券轉為持有其他資產，一般情況下，債券流出嘅現金又會流入股市，所以三者之間互相影響。

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情