2020-07-07
退休前、驗全身、清手術
限聚令過，飯局頻頻，真快樂。多月冇見老友，雖則隔別半年，竟有恍如隔世之感！
一群老同學相聚，計計歲數，全部已或快退休，話題當然圍繞在健康及養生。
赫然發覺F姐撐著兩支拐杖出現。眾人好奇：「喂喂，發生乜嘢意外咁大件事？」
「冇啊，退休前一年，上司私人提出醒，叮囑我——有手術，快點做！因一日未退休，一日仍有公司醫療保險。唉，我對膝頭因早年不停打羽毛球，五十歲開始全面退化。專家斷定冇得醫，唯一可做是換膝。兩隻夾埋幾十萬，本想輪公院，但要等到天長地久。幸得上司點醒，趁未退休搵私家醫生寫紙證明唔做唔掂，上司即簽，嘻嘻，住私家病房，慳返幾十萬呀！」
小弟呢輩人，多數一生一世打一間公司工（我就是香港電台！），從未變異，亦因身為管理層，要以身作則，故很少「貪圖」個人福利與申領甚麼公司各種津貼（著數），只以責任為本，日做夜做。結果，當然五十歲ac左右捱出不少長期病患。這個，在任何現代城市做大機構中高層者，皆非常普遍。所以，一定要照顧身體之餘，亦毋須客氣。反正已為公司獻出一生青春，退休前，幾大做次全身檢查，趁有醫療保險，快快完成必要的昂貴手術。
昔日多項高壓工作集一身，結果壓出抑鬱症，成為李誠教授（中）樣辦病人
我如一般中高層打工族，在職時只知瞓身工作，對有關健康一切，全面忽略
我不能享受此優待，因公務員與普通市民到公家醫院求診，一視同仁，沒有優待，必須排大隊。
但在私人機構者，退休前一定要為自己打算，盡量利用公司錢為退休後健康鋪路。
有公司保險的，退休前來次切底健康檢查，至為重要
一般大集團，皆為員工提供完善醫療保障
原來，F姐的經驗，在座的J哥與A佬皆有相同經歷。
「好彩我退休前一年全身檢查，否則，大鑊！因心臟內有三條血管塞咗八成，分分鐘中風！於是火速安排通波仔。退休前，公司保險找數。退休後，嘩！冇三十萬一定埋唔到單啊！」J哥一邊講一邊展示手臂插管留下的疤痕。
「喂喂，我都係呀。未退休前成日大便出血，以為痔瘡，平時工作咁忙，點會理？結果，又係俾CEO點醒，速速撲去驗。一驗，標曬冷汗，原來三期大腸癌！呢個手術，在私家醫院自己找數，可能喊到收唔到聲㗎，好彩退休前半年搞掂！」
膝關節退化、血管閉塞及直腸癌，在上年紀人士中極普遍，打工一族宜退休前利用公費醫療徹底治理，因每項皆涉幾十萬手術費
總結，退休前，一定要驗全身，清手術。應得的醫療福利，千祈咪客氣或諱疾忌醫！
《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。
樂本健【年度感謝祭】維柏健及natural Factors全線2件7折► 了解詳情
