【最佳拍檔】想上位？成為上司的御用「髮型師」吧！

　　剪頭髮，選對的髮型師非常重要。

 

　　「前面修短少少，後面偷返薄啲就得，長度keep返。」剪前，你以為自己畀咗一個非常清晰嘅instruction。

 

　　點知，當髮型師剪完，再攞塊鏡畀你望望時，你就發覺佢幫你偷薄晒之餘，仲剪短咗兩吋，連條馬尾都幼晒。然後佢仲要加句「點呀，而家清爽啲咪幾好」。

 

　　遇著不合心意嘅髮型師，無論你喺開始剪前，花幾多時間、心機去講解你想點剪，但最終佢都可以剪出一個令你後悔兩個月嘅髮型。所以如果遇到一個髮型師，可以令你不發一言，或者只講一句「照舊」，就剪出你的心水髮型，那你真的非常幸運。

 

 

　　在職場也同樣。如果有一個好下屬，就像遇到一個合你心意嘅髮型師，那就不止是幸運，更是「三生都有幸」。每天跟上司相處嘅你，又希望成為你上司嘅御用「髮型師」嗎？

 

「令你的上司Carefree」

 

　　合心意嘅髮型師就係可以令客人咩都唔駛做，或畀最少嘅指示，都可以好安心咁將個頭交畀佢。相同原理亦適用於下屬。下屬嘅目標應為令上司對自己有信心，將差事交托自己。做事有交帶，定時向上司匯報進度，建立良好track record，自然可以慢慢讓你成為上司的左右手。對一個信得過嘅下屬，大部分上司亦非常樂意委以重任，將權力下放，因為咁做亦即減輕上司自己的工作。

 

「了解上司的Ultimate Goal」

 

　　有時上司向你指派工作，佢未必會講清楚每項工作的最終目的，有時可能只是希望你減輕他／她嘅文書雜務，上司自己將要繼續完成工作另一部分，亦即step 2。作為下屬，你可以在上司指派嘅工作範圍以外諗多一步，猜想一下上司那項工作的最終目的究竟是甚麼。簡單有如上司要求你梳理Excel數據（step 1），你可以在梳理數據以外，加插對數據的分析及看法（step 2），因為你明白上司並不會無緣無故叫你整理一個Excel表，他／她背後必定另有原因。嘗試令上司知道你不止是一個只替他／她處理文書雜務的下屬。Again，有效減輕上司的工作是下屬嘅加分位。

 

　　多從上司思考角度出發，將有助你比別人跑得更快。我經常鼓勵人不要以自己所屬職級嘅想法去工作，而是應該以自己高一級或兩級嘅出發點去做事及思考，例如你現在是助理經理，你便嘗試以經理的思考模式去工作。

 

　　遇到不合心意嘅髮型大可於兩個月後重頭再來，再找另外一位髮型師，但遇到不合心意的下屬，上司最少要再經歷請人、再training的艱辛過程。所以如果你能夠成為他／她的那位「髮型師」，你的職場道路亦會更好走。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】財政預算案展開公眾諮詢，學者倡問責官員減薪並削減公務員編制，你是否認同？ ► 立即投票