有位從事保安行業的朋友說：「賊未必有樣睇，但受害者有時有跡可尋。」

 

　　他解釋說：賊人要搶或偷東西前，先要鎖定目標，除了打量其是否身光頸靚，即錢財(轉化成首飾、名牌等)是否露眼之外，還會觀察其神情舉止。

 

 

　　容易成為Victim的身體語言有：

 

　　1、步履蹣跚，即行路拖吓拖吓咁，反映此人一是極端疲累、一是或老或弱的殘兵，冇乜反抗力。

 

　　2、眼神慌失失。反映不熟悉地方，真係「唔知掟」。

 

　　3、「頭岳岳」、周圍望。注意力不集中。

 

　　4、眼神迷惘，若有所思，唔知想乜。反應慢。

 

　　這些是反面教材。正面建議是：如果你表現得從容鎮定，有警戒性，佢就搵過第二個「老細」啦，佢搵食啫，取易不取難，無謂糾纏吖!

 

　　具體而言，步履要穩定，有清楚節奏；眼睛有焦點，向前看，不要東張西望。整個人的Body　Language表示出堅定自信，好似好有Sense　of　Purpose咁，就會大步檻過架喇。

 

　　說到避賊，江湖流傳一個退賊的攪笑故事，說者言之鑿鑿，力証有其事。

 

　　話說有奇女子在溫哥華一僻靜大廈的升降機中遇劫，遭一年青老外持刀威嚇，他搶了手袋之後正欲按掣出lift，女子忽然向他拋個媚眼，柔聲道:What　about　me?(我呢?)

 

　　lift門一開，老外即發足狂奔，連手袋都丟下!

 

　　聽者的反應如下:

 

　　「個賊一定係新仔!」

 

　　「可能係靚仔，靚過D求愛盛男!」

 

　　「個賊梗係驚自己得財而失身咧!」

 

　　「個女子膽色過人，不過可能姿色嚇人!」

 

　　明顯沒有人覺得此事件有任何教育意義，只集中在其娛樂成分。

 

　　講番積極的身體語言，其實要避免被賊人看中，與希望被僱主選中，都是如出一轍的——醒神D!

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好