林鄭預測施政大事神準 佢話2019年最大件事會係......

　　話說Jenny今日出席咗「2018特區政府施政十件大事評選」頒獎禮，而講到特區嘅施政大事，又點少得特首林鄭呢？原來林鄭唔單止好打得，對香港大事預測都好準㗎！上年頒獎禮，Carrie預測高鐵、港珠澳大橋都會係2018年施政大事，睇返今年嘅評選結果，高鐵通車位列第一、港珠澳大橋通車就排第二！

林鄭:粵港澳大灣區發展規劃將成19年施政大事

　　而林鄭喺今屆頒獎禮又再嚟個大事預測，話粵港澳大灣區發展規劃綱要嘅正式公布，將成為今年嘅施政大事！仲話2019年係粵港澳大灣區嘅開局之年，而高鐵同港珠澳大橋開通，形成咗一小時生活圈，佢仲攞埋2月10號嘅數字出嚟，話由高鐵開通至今，已經有790萬旅客人次使用過高鐵，而遲過高鐵開通嘅港珠澳大橋就更加犀利，開通後已經有750萬人次用過喇！

基建再出事 就No eye see

　　其實林鄭引用咁多數字，都係想講高鐵同港珠澳大橋通車後，基建未開通之前嘅反對同憂慮都一掃而空，港珠澳大橋嘅使用人次大增，仲有人問高鐵可唔可以開多啲直通點呀！另外，林鄭又提到今屆評選結果入面，有兩項大事都同房屋土地有關，佢話睇到市民對房屋嘅迫切需求，而政府亦會視房屋供應為最迫在眉睫嘅事，會多管齊下、未雨綢繆應對。

　　講返林鄭預料係2019施政大事嘅粵港澳大灣區發展，既然林鄭講到基建對大灣區發展咁重要，Jenny都好希望我哋啲基建(好似鐵路嗰啲呢)唔好再鬧出咩冬瓜豆腐呀、醜聞咁啦，唔係就真係No eye see喇！到時「爺爺」都幫唔到我哋呀!

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇