十萬個激嬲老婆的理由：黃錦星「環保式自殺」 太太從此唔再送生日禮物

　　環保局局長黃錦星（星星局長）一向推祟環保大家都知，今日佢就同一班學生Share自己嘅奮鬥史，仲話細細個由深水埗板間房搬到廉租屋沙田㘭邨住，自此有「左飛鵝、右獅子」伴住，令佢養成接觸大自然嘅習慣，加上出身基層爸爸媽媽都教佢要慳家、惜食、唔好浪費。適逢今日情人節，佢就為咗唔好浪費一早問定太太想咩禮物，但自爆咗一件「環保式自殺」事件，一句激嬲咗太太，從此冇生日禮物收。噢……

 

 

 

「未試過苦 又點知道咩係甜」

 

　　黃錦星於童年時曾於深水埗板間房生活，他憶述當時一家七口需同居於一張碌架床上，「父母瞓上格，我哋五兄弟姐妹加塊板就瞓下格。」仲勉勵學生唔好怕捱苦，「未試過苦，又點知道咩係甜」。齋噏好悶架嘛，所以局長好大方咁Share埋佢童年、青年嘅絕密照，Jenny忍唔住要Cap低同大家Share！（見文末）

 

一句激嬲星太 又關全球暖化事？

 

　　講起甜，適逢情人節，情侶間互相送朱古力、送禮物已經係常態，甜膩氣味充斥街頭各處。星星局長都好Sweet咁話都會買禮物畀太太，不過就有事先問定對方想要乜，至於會送咩？佢就答：「唔、話、你、知！」但就講起以下呢段「環保式自殺」事件：

 

　　話說局長係冬天生日，所以佢太太每年都會送佢一件冬天衫做為生日禮物。有一年，局長覺得唔太妥，決定同太太講……

 

　　星：其實上年、上上年嗰幾件我都係著咗一次、兩次、三次咋……仲好新淨啊！所以今年你都唔使再送新嘅冬天衫畀我喇！

 

　　星太：……

 

　　星：何況而家香港冬天都比較飄忽，冬天都唔知去咗邊……

 

　　然後，星太嬲咗！

 

　　之後點收科？星星局長話當時同太太好好傾咗氣候變化嘅問題，太太明白晒，就下咗啖氣喇！但星太都補咗句：「咁你以後生日呢，都唔駛收禮物喇！」局長仲藉機同在場學生講，快樂唔應該單睇物質，最緊要健健康康。Jenny對此非常認同！

星星局長一家三口。

 

 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】民主派初選案，45名罪成被告判囚4年2個月至10年不等，你認為判刑是否具阻嚇作用？► 立即投票