相信大家都知，每逢星期二Jenny同埋行家都會去等行會開會，為嘅就係趁行會開會前可以就住近日發生嘅社會大事即時問問特首有咩回應，而特首於行會召開前見傳媒亦成為咗今屆政府嘅慣例。今日就有新面孔代特首回應問題，佢就係首次代特首主持行政會議嘅律政司長鄭若驊喇！Why？因為林鄭同另外兩個司長都唔喺香港嘛，咪由鄭司長署理特首職務囉！

鄭司長答問題冇驚喜

　　我哋特首林鄭百足咁多爪，有時要外訪未必可以趕返嚟開行會，所以有時會由政務司長張建宗（張宗）署任，今次林鄭就去咗上海出席首屆中國國際進口博覽會開幕式，同一時間張宗今次亦飛埋去瑞士日內瓦出席聯合國人權理事會會議；張宗唔喺度平日就輪到財政司長陳茂波（波叔）署任；今次因為波叔隨林鄭去埋進博會，結果就要由鄭司長出山囉！

　　鄭司長一向鍾意答問題嗰陣「擠牙膏」，Jenny對於佢答問題其實都冇咩期望。記者問咗幾條問題，包括：港珠澳大橋開通後交通問題、同一日團冇「地接社」照違法出團；民族黨陳浩天提出上訴；仲有死因庭要求跟進事件的士司機被殺案或Lan線自殺案有冇刑事成分，律政司幾時會調查完成。果不期然，Jenny就覺得答完等於冇答！咁又係，作為署理特首其實又冇咩可以答。

　　今朝問答全文：https://www.info.gov.hk/gia/general/201811/06/P2018110600385.htm

張宗波叔外訪有得享寧靜？

　　話分兩頭，張宗波叔齊齊唔喺香港，Jenny覺得都算「避過一劫」，皆因Jenny同行家都聽到啲傳聞，話林鄭心思思想為管治班子執執位，當中張宗波叔係高危咁話。雖然林鄭已經話暫時冇Plan，相關報道係「揣測」，但你話喇，如果張宗、波叔兩位呢兩日喺香港的話，一定畀人咬住唔放，唔問「心情如何」，都可能問會唔會先下手為強自己唔Do先啦！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【香港好去處】etnet全新頻道盛大推出！全港最齊盛事活動資訊盡在掌握！► 即睇