等了又等～等到食大閘蟹嘅季節差唔多過咗一半，香港人都仲未有大閘蟹食，皆因內地部門到而家都未批衛生證明書畀香港嘅蟹商，而日、韓、台嗰邊早就有批文喇！Jenny都好掛住大閘蟹嘅滋味吖！喺呢個時候，美食當前應該唔少人，忽然間都好愛「國貨」！

望穿秋水 終於等到

　　不過香港未有衛生證明書，都無阻香港人食蟹嘅決心！因為已經有蟹商諗到，將內地供韓嘅大閘蟹，轉運到嚟香港，嗰啲蟹一樣有衛生證明書㗎，不過就要遊陣「飛機河」先到。雖然唔係「直送」，但都起碼有得畀香港人過吓口癮先！

有食唔食罪大惡極！

　　之但係點解日韓台都照常出咗批文，反而一河之隔嘅香港就到而家都未有呢？小妹聽過一個陰謀論，就係話因為前年嘅內地大閘蟹含二噁英事件，香港收緊檢驗要求，而供港大閘蟹又只係佔內地出口嘅大閘蟹一小部分，所以內地「唔憂做」之下，都唔太情願供貨落香港，所以我哋到之前咪冇得食囉！點都好，計Jenny話而家有得食，幾大都要食！

　　小妹聽聞老一輩教食大閘蟹係「九月圓臍十月尖」，意思即是農曆九月應該食蟹乸，農曆十月就食蟹公。不過而家農曆九月都就快過去，希望張證明書快啲批，大家仲趕得切食蟹公嘅時令啦！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【香港好去處】etnet全新頻道盛大推出！全港最齊盛事活動資訊盡在掌握！► 即睇