2018-09-28
國慶煙花「再創輝煌」去西九站平台花園睇至潮
唔經唔覺又就快到10月!Jenny都係時候又要去睇下紅葉啦!不過去睇紅葉之前,大家亦都可以留喺香港睇國慶煙花吖!
電腦模擬煙花效果圖。
「再創輝煌」有錦冠
政府今日就公布咗國慶煙花安排,今年都係分咗8幕,大概放23分鐘到,又係有心心、哈哈笑、蝴蝶咁,聽講到壓軸一幕「再創輝煌」(乜咁似大台劇名)嗰陣,煙花會呈現金碧輝煌嘅錦冠圖案,以祝願祖國發展百花齊放喎!
高鐵西九站 飽覽維港景
雖然驟眼睇,今年嘅煙花款式同上年差唔多,不過今年有個新地方睇煙花,就係新開嘅高鐵西九龍總站個平台花園喇!Jenny喺上次高鐵通車日都特登上過去睇,真係可以飽覽成個維港景色㗎!警方都預計今年會有唔少人去嗰到睇煙花,不過唔知有冇人數限制呢?太多人負荷唔到,就唔好啦……
個view真係無得頂!
至於年年都係睇煙花熱點嘅尖沙咀,警方就預計有25萬人到場,所以由7點開始,紅磡繞道、梳士巴利道和廣東道等道路就會封閉;天星渡輪碼頭巴士同九龍公園徑路段亦都會喺7點半始封,到8點就封埋建灣街一段路段。至於紅磡海傍路段就視乎當時人群聚集,再考慮封唔封路。司機大佬當時就要留意電台廣播喇!
天文台就話,國慶當日部分時間有陽光,初時有一兩陣驟雨。應該對睇煙花冇乜影響喇,大家可以放心擔定櫈仔啦!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
《說說心理話》【奧運劍擊熱】大師兄張小倫親身分享!贏在起跑線=壓力?如何培育子女有卓越成就?► 即睇