廣州南站有神秘蟲蟲 原來站內冇救護員

　　高鐵終於喺噚日正式通車喇！相信上星期五有睇《言歸政傳》嘅讀者都知道，小妹都有幸買到首日嘅車票呀！

 

正式投入運作梗要影張相紀念下先啦！

 

　　為咗呢條高鐵，辛苦敝公司的攝記哥哥已經連續兩日要天未光就出動，22號Call清晨6點，23號就Call凌晨4點，真係「沒有最早，只有更早」！所以話每張靚相背後，真係歷盡辛酸㗎！而作為傳媒嘅一分子，Jenny就梗係要「去旅行，去到盡」，跟實身邊嘅同事同埋攝記哥哥身後，齊齊搭高鐵上廣州喇！不過身邊嘅同事就還須努力工作，Jenny就可以享受一下高鐵嘅與別不同，順便計劃下返大陸整個「微旅行」畀自己Relax！

 

其實各大媒體天未光就出發去西九站喇！

夠快夠穩手機唔跌

 

　　高鐵出名又快又穩，既然而家有埋香港段，試下高鐵有幾穩定是常識吧！同事打算拎個水樽出嚟做測試，Jenny就覺得呢項咁偉大既基建，質素點都有返咁上下，梗係要向高難度挑戰！倒置水樽已經唔夠喇，咁啱同事就有部豎得起嘅手機，識玩梗係玩豎手機！

 

　　同事部手機厚0.3吋，豎起嚟又真係唔會跌㗎喎！不過可惜喺轉彎嘅時候，佢都係「啪」一聲咁跌低咗，Jenny宣布高鐵嘅平穩度係尚算合格嘅！

 

來往香港及內地只需一步，成為站內打卡熱點。

 

神秘蟲蟲咬玉臂 票務員照顧勁有愛

 

　　話晒廣州南站都係冇香港咁多高樓大廈，到站後Jenny想呼吸返啖新鮮空氣之時，突然就聽到身邊同事一聲慘叫，原來係有一隻類似蜜蜂的昆蟲針咗佢一下，佢手臂就即刻變得紅腫，嚇到佢花容失色，即刻搵票務員姐姐問下呢度有冇救護員或者醫院可以去檢查下。點知票務員姐姐話呢度冇救護員，只有一間藥房，而最近嘅醫院都要搭十幾分鐘車先可以去到！

 

 

一叮即腫，嚇到同事花容失色。

 

　　雖然票務員姐姐好好人咁帶我哋一行人去到藥房，幫小妹嘅同事做初步處理，不過咁大型嘅高鐵項目都冇救護員駐守、醫院又咁遠，有咩事上嚟都真係幾無助！希望以後嘅高鐵會改善喇！至少有個識得急救嘅同事睇住個場都好呀！

 

 

廣州南個站好大好光猛，可惜冇救護員駐守。

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】財政預算案展開公眾諮詢，學者倡問責官員減薪並削減公務員編制，你是否認同？ ► 立即投票