「峯搶手機」事件過咗成個禮拜，事件主角許智峯都可以話有得做嘅都做晒，歉就道咗、公開信又出咗、黨籍都被人凍埋，不過建制呢邊嘅攻勢梗係陸續有嚟，就好似今日咁，內會就要討論新民黨主席葉劉話要提嘅譴責動議，不過內會係冇得投票嘅，所以今日個會大家都係純打口水戰。

 Miss Mo：「如果我去搶佢（男EO）手機，又會唔會有人話我『冒犯男性』呢？」

　　其實峯仔今次個行為，Jenny就覺得點講都講唔過去、錯就錯硬㗎啦！不過小妹都唔覺得如果將個事主換成男性又有咩合理之處，事關本身搶嘢呢個行為就係唔啱，仲使乜分搶女EO嘢定係搶男EO嘢呢？但係觀乎建制派有啲女性議員，喺呢方面就好大反應，將件事講成峯仔「侮辱女性」乜乜乜！當中嘅佼佼者都非民建聯嘅葛珮帆（EQ）同埋工聯會嘅麥美娟莫屬！Jenny都好有印象，佢哋差唔多次次評論親呢件事，都一定要加返句「侮辱女性」。小妹第一次聽嗰陣都係心入面「吓」出嚟，唔通搶男EO手機就得嘅咩？難道真係學似唔少港男話齋，香港其實口講男女平等，實質係女權主義？

　　呢個講法聽咗咁多日，搞到同樣身為女性嘅毛孟靜（Miss Mo）今日都頂唔順，奉勸大家如果真心相信男女平等，就唔好成日將件事轉移去到「侮辱女性」，又自我犧牲咁反問「如果我去搶佢（男EO）手機，又會唔會有人話我『冒犯男性』呢？」估唔到又引來麥美娟嘅黨友何啟明認同噃，不過佢就梗係趁機串返Miss Mo「你做就肯定係『抽男人水』！」而EQ嘅黨友何俊賢都覺得今次事件唔係男女嘅問題，係恃強凌弱、大蝦細嘅問題囉！男女議題竟然可以令到本身打風都打唔甩嘅建制派有意見分歧，睇嚟遲啲議會唔只得派系之爭，可能仲會有男女之爭添！Jenny真係要坐定定喺度食花生先！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情