連踩超過20小時不停工作之後，Jenny終於等到立法會補選4個議席嘅結果出爐，好多人都對民主派候選人、DQ主角之一嘅姚松炎（姚教授）竟然會輸畀民建聯嘅鄭泳舜（舜仔）感到十分驚訝，不過其實結果一如Jenny賽前所料。本身姚教授就因為空降而冇地區樁腳，而且不熟當區民情，係先天不足；而舜仔群星拱照，先有鐵票護航，再加選舉工程包裝得好，此消彼長之下，姚教授本來已經危危乎。

 

九西點咗兩次票，都扭轉唔到結果。圖為行家等候每個票站公布選票分布。紅色為已重點，白色為未重點。

 

DQ光環只是強力電筒

 

　　好多人可能會問Jenny：姚教授個DQ主角光環唔夠用咩？的確呢個「執」光可以幫到手，但咁係唔夠架！有時可能姚教授都以為個「光」係大光燈，點知去到九西區充其量只能做個強力電筒，照到近照唔到遠囉！

 

　　經過幾個月選戰之後，Jenny向一啲義工同九西街坊打聽過，佢地都大讚姚教授係好人，望上去又做得野，但就硬係同佢好似唔太啱Channel咁……此話何解？有泛民義工都唔怕同Jenny講，話覺得姚教授唔太識得而家地區直選嘅選戰玩法，同埋喺街頭拉票嘅策略，有時會太有諗頭，結果就變咗離地，加上街站擺得少，某程度都影響到居民點睇佢。

 

居民認唔到「嘜頭」

 

　　話明空降冇地區樁腳，對手舜仔卻係區議員，咁姚教授一定要借助地區民主派的力量，點知佢又偏偏未有好好利用，Jenny甚至聽聞尋日民協馮檢基（基哥）昨日撐場拉票，都係基哥見到告急自發出現幫忙催票，姚教授事前竟然冇叫佢幫忙。姚教授啊！九西有唔少老人家，其實都係認嘜頭投票，你一個新仔過來選，冇搵多幾個舊人帶吓出來見鄉親父老，咁咪蝕底囉！

 

　　姚教授今次都知衰，灰晒咁同Jenny講會為敗選負上全部責任，直認係選舉工程嘅策略失誤，自己無直選經驗。

 

　　不過，佢就否認民主派高估DQ效應，認為港島區出現兩次DQ，民主派候選人區諾軒可以贏，係充分反映市民幾不滿政府嘅DQ行為云云……只係各處鄉村各處例，港島玩法又點同九西玩法呢？何況區諾軒本身都是區議員嚟啊！

 

舜仔鐵票＋包裝＝立法會議席

 

　　舜仔今次威威啦！成為直選補選嘅建制派「零的突破」，以舜仔知名度首次出戰就拎到10.7萬票，Jenny除咗一如以往地讚嘆建制鐵票嘅「硬度」之外，亦不得不讚吓整個競選團隊資源係如此豐盛，旗海同廣告處處已經唔係出奇事，又有資深傳媒人幫手搞PR，加埋個「乖乖仔」、「年青才俊」包裝，再配埋花名「高民望」嘅高永文醫生時刻隨行在側咁滯，真係行路都有陣風咁……舜仔成功令唔少人投票日乖乖奉上選票。你可能會話啲人咁易氹咩？咁你真係未明箇中道理喇！

 

　　Jenny有個姊妹住港島前排選戰期間，時不時都會收到舜仔宣傳，可見舜仔嘅大包圍政策幾進取！一於有Send錯冇放過！但係呢，選前舜仔就好進取，但選舉當日舜仔發畀傳媒嘅採訪行程得兩單咁大把（黨友鄧家彪都有3單啦！），唔通佢一早知自己會贏？

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情