2018-01-25
補選報名撞時間 喂!阿太你邊位啊?
話咁快立法會補選嘅提名期下星期一(29日)就結束,各個之前表示話有意參選嘅候選人都快快手手做最後衝刺。當中暫時以新界東最多人加入沁戰圍,而且娛樂性亦都幾高下。今日就2個人去咗新東報名喇,啲時間仲要嘭嘭聲,Jenny表示真係追得好頻撲囉!
離遠見到趙佩玉,我諗好多人都會問一句:阿太邊位啊?
劉頴匡call time至set場
嗱!今朝11點新東就有本土派劉頴匡同反同性婚姻組織的基督徒趙佩玉,話會同一時間報名,場地都係同一個,但見記者地點就一個喺一樓,一個喺四樓,好彩最後兩個人都返回同一地點見記者,Jenny先唔需要使出失傳已久嘅分身術咋!
話說小妹平日習慣早咗幾個字到場,睇下環境同八卦下,只不過今日去到嘅時候竟然前面空無一人,一時間仲以為自己去錯地方添!同啲行家等到差唔多夠鐘,先見劉生同佢團隊過嚟Set場,Jenny直情見到各位行家頭上出現咗三條黑線呀……
趙佩玉存在感=0
不過劉生起碼都叫準時到,至於趙女士,小妹就望嚟望去都見唔到佢。終於,正當劉生Set場Set到一半之際,Jenny眼尾「嗖」到一位阿太閃過,咦!呢位咪趙女士?!好彩小妹有做功課,唔係真係唔認得佢。趙女士左望望右望望,再望咗劉生一望,跟手就喺消失小妹視線範圍。Jenny見啲行家淨係專注於劉生到,本來以為大家都好似Jenny咁,覺得趙女士冇乜新聞價值,所以就由得佢。點知事後先知原來大家都尋人中。
做做吓嘢,行家忽然問Jenny「趙佩玉到咗未?」當佢哋從小妹口中得知原來佢已經入咗去報名嘅時候,大家都不約而同「吓!」一聲。冇計啦!趙女士個樣又真係太「平凡」喇!行開行埋都好難認到佢,大家唯有打畀佢,叫佢報完名再落嚟講兩句啦!今次,趙女士就因為呢個「平凡」樣,反而令大家更記住佢,佢可能會大叫「感謝主!」不過,Jenny就覺得唔算係一件好事呢……
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情